बातम्या

विद्यानंद बापटांच्या समर्थनार्थ अवधूत गुप्ते मैदानात; डीजे बंदीवर खास गाणं चर्चेत!

By Shivani - 5/9/2026 4:49:13 PM
Share This News:

अवधूत गुप्ते विद्यानंद बापट यांच्या समर्थनार्थ; डीजे बंदीच्या मुद्द्यावर खास गाणं, सोशल मीडियावर चर्चेला उधाण

पुणे :

गणपती उत्सवाच्या काळात डीजे बंदीची मागणी केल्यामुळे चर्चेत आलेले विद्यानंद बापट सध्या सोशल मीडियावर चर्चेचा विषय ठरले आहेत. डीजे बंद करण्याच्या मागणीवरून त्यांना मारहाणही झाल्याची घटना समोर आली होती. या पार्श्वभूमीवर आता मराठी संगीतविश्वातील लोकप्रिय गायक, संगीतकार आणि परीक्षक अवधूत गुप्ते यांनी विद्यानंद बापट यांना पाठिंबा दिला आहे.

अवधूत गुप्ते यांनी विद्यानंद बापट यांच्या समर्थनार्थ एक खास गाणं तयार केलं असून, त्याचा व्हिडिओ सोशल मीडियावर शेअर केला आहे. या गाण्याची सध्या पुण्यासह महाराष्ट्रात चांगलीच चर्चा रंगली आहे.

विद्यानंद बापट यांच्या समर्थनार्थ अवधूत गुप्तेंचं गाणं

विद्यानंद बापट हे केवळ डीजे बंदीच्या मागणीमुळेच नव्हे, तर त्यांच्या शुद्ध आणि अस्खलित मराठी बोलण्याच्या शैलीमुळेही चर्चेत आले आहेत. त्यांच्या भूमिकेला पाठिंबा देण्यासाठी अवधूत गुप्ते यांनी स्वतः संगीतबद्ध केलेलं आणि गायलेलं गाणं सोशल मीडियावर प्रसिद्ध केलं.

या गाण्यातून सरळ आणि स्पष्ट भूमिका घेणाऱ्या व्यक्तीला समाजात कोणत्या प्रकारच्या विरोधाला सामोरं जावं लागतं, यावर भाष्य करण्यात आलं आहे.

“तुझ्यासारख्या सरळ माणसाचा ना हा धंदा…”

अवधूत गुप्ते यांनी या गाण्यात विद्यानंद बापट यांचा थेट उल्लेख करत त्यांच्या भूमिकेवर भाष्य केलं आहे.

“तुझ्यासारख्या सरळ माणसाचा ना हा धंदा
विद्यानंदा ओळख इथल्या आनंदी आनंदा…”

त्यानंतर गाण्यात स्वच्छ विचार आणि स्वच्छ वाणी असणाऱ्या व्यक्तीची समाजाकडून होणारी खिल्ली यावरही भाष्य करण्यात आलं आहे. सरळ आणि स्पष्ट भूमिका घेणाऱ्या माणसाला या जगात जगताना किती अडचणींचा सामना करावा लागतो, हा आशय या गाण्यातून मांडण्यात आला आहे.

सोशल मीडियावर लाईक्स-कमेंट्सचा पाऊस

अवधूत गुप्ते यांनी व्हिडिओ शेअर करताना कॅप्शनमध्येही गाण्याचे बोल लिहिले आहेत. तसेच #supportbapat, #vidyanandbapatsupport आणि #hats_off_bapat हे हॅशटॅग वापरले आहेत.

त्यामुळे अवधूत गुप्ते हे विद्यानंद बापट यांच्या भूमिकेच्या समर्थनार्थ ठामपणे उभे असल्याचं दिसून येत आहे. त्यांच्या या पोस्टवर चाहत्यांकडून मोठ्या प्रमाणात प्रतिक्रिया, लाईक्स आणि कमेंट्स येत आहेत.

डीजे बंदीच्या मागणीमुळे बापट चर्चेत

गणपती उत्सवाच्या काळात मोठ्या आवाजातील डीजेच्या वापराला विरोध करत विद्यानंद बापट यांनी डीजे बंद करण्याची मागणी केली. या भूमिकेमुळे त्यांना विरोधाचा सामना करावा लागला. मात्र, आता अवधूत गुप्ते यांच्यासारख्या लोकप्रिय कलाकाराने त्यांच्या समर्थनार्थ गाणं केल्याने या प्रकरणाला आणखी मोठी प्रसिद्धी मिळाली आहे.

पुण्यातील या मुद्द्याची चर्चा आता सोशल मीडियासह महाराष्ट्राच्या संगीत आणि मनोरंजन विश्वातही होताना दिसत आहे.

‘सारेगमप’च्या मंचावरही अवधूत गुप्ते

दरम्यान, अवधूत गुप्ते पुन्हा एकदा ‘सारेगमप’च्या मंचावर परीक्षकाच्या भूमिकेत दिसणार आहेत. अनेक वर्षांपासून आपल्या वेगळ्या संगीतशैलीमुळे आणि स्पष्ट मतांमुळे प्रेक्षकांच्या मनात स्थान निर्माण करणारे अवधूत गुप्ते नव्या पर्वात नव्या पिढीच्या कलाकारांचे परीक्षण करताना दिसतील.

‘सारेगमप’च्या या नव्या पर्वात नवीन टॅलेंट, नवीन चेहरे आणि नवे आवाज पाहायला मिळणार आहेत. सोशल मीडिया आणि डिजिटल माध्यमांमुळे संगीत ऐकण्याची आणि गाणी शोधण्याची पद्धत बदलली आहे. आजची पिढी अधिक वेगवान आणि स्मार्ट असून, संगीत आत्मसात करण्याची त्यांची माध्यमंही बदलली आहेत.

याच बदलत्या संगीतविश्वाचा अनुभव ‘सारेगमप’च्या नव्या पर्वातून प्रेक्षकांना मिळणार आहे.

दरम्यान, विद्यानंद बापट यांच्या समर्थनार्थ अवधूत गुप्ते यांनी केलेलं हे गाणं सोशल मीडियावर चांगलंच व्हायरल होत असून, त्यांच्या या अनोख्या पाठिंब्याची सध्या सर्वत्र चर्चा सुरू आहे.