बातम्या

गणेश विसर्जनावेळी प्लास्टिक पिशवी टाळा; कोल्हापूर महापालिकेचे आवाहन

By Shivani - 11/9/2026 5:51:12 PM
Share This News:

गणेश विसर्जनावेळी निर्माल्यासाठी प्लास्टिक पिशवी टाळा; कोल्हापूर महापालिकेचे आवाहन

निर्माल्य नदी, तलाव किंवा विसर्जन कुंडात न टाकता स्वतंत्र संकलन केंद्रात जमा करण्याचे आवाहन; पर्यावरणपूरक गणेशोत्सवासाठी महापालिकेचा पुढाकार

कोल्हापूर :

गणेशोत्सवाच्या पार्श्वभूमीवर गणेशमूर्ती विसर्जनासाठी शहरातील विविध विसर्जनस्थळी नागरिकांची मोठी गर्दी होणार आहे. या पार्श्वभूमीवर गणेशमूर्तीला अर्पण केलेली फुले, हार, दुर्वा, पाने, नारळ आदी निर्माल्य प्लास्टिक पिशव्यांमध्ये भरून विसर्जनस्थळी आणू नये, असे आवाहन कोल्हापूर महानगरपालिकेच्या आरोग्य विभागामार्फत करण्यात आले आहे.

गणेश विसर्जनावेळी निर्माल्य प्लास्टिक पिशवीसह नदी, तलाव किंवा विसर्जन कुंडात टाकल्यामुळे जलप्रदूषणासोबतच कचरा व्यवस्थापनाची समस्या निर्माण होते. प्लास्टिकमुळे जलचर तसेच पर्यावरणावरही विपरीत परिणाम होण्याची शक्यता असते. त्यामुळे नागरिकांनी निर्माल्य आणि प्लास्टिक कचरा स्वतंत्र ठेवून विसर्जनस्थळी उपलब्ध असलेल्या निर्माल्य संकलन केंद्रात निर्माल्य जमा करावे, असे महापालिकेने स्पष्ट केले आहे.

निर्माल्य वाहून नेण्यासाठी प्लास्टिकऐवजी कापडी किंवा कागदी पिशवीचा वापर

गणेशमूर्ती विसर्जनासाठी जाताना निर्माल्य वाहून नेण्यासाठी नागरिकांनी प्लास्टिक पिशव्यांचा वापर टाळावा. त्याऐवजी कापडी पिशवी, कागदी पिशवी किंवा अन्य पर्यावरणपूरक साधनांचा वापर करावा, असे आवाहन करण्यात आले आहे.

विसर्जनस्थळी जमा होणारे निर्माल्य महापालिकेच्या माध्यमातून स्वतंत्रपणे संकलित केले जाणार असून, त्यावर योग्य पद्धतीने प्रक्रिया करून विल्हेवाट लावण्यात येणार आहे.

नदी, तलाव आणि विसर्जन कुंडात निर्माल्य टाकू नका

नागरिकांनी फुले, हार, दुर्वा, नारळ, पाने आदी निर्माल्य पाण्यात विसर्जित न करता निर्धारित निर्माल्य संकलन केंद्रातच जमा करावे. तसेच प्लास्टिक पिशव्या, थर्माकोल, प्लास्टिक सजावटीचे साहित्य आणि अन्य कचरा पाण्यात किंवा विसर्जनस्थळी टाकू नये, असेही महापालिकेने आवाहन केले आहे.

“निर्माल्य स्वतंत्र जमा करूया – प्लास्टिकमुक्त गणेशोत्सव साजरा करूया” या उपक्रमात नागरिकांनी सक्रिय सहभाग नोंदवावा. श्रद्धेसोबतच पर्यावरण संवर्धनाचा संदेश देणारा गणेशोत्सव साजरा करण्यासाठी नागरिकांनी महापालिकेच्या निर्माल्य संकलन व्यवस्थेस सहकार्य करावे, असे आवाहन आरोग्य विभागाने केले आहे.

स्वच्छ, सुंदर आणि पर्यावरणपूरक कोल्हापूर घडविण्यासाठी गणेश विसर्जनावेळी निर्माल्यासाठी प्लास्टिक पिशवीचा वापर टाळण्याचे आवाहन महापालिकेने केले आहे.