राजकीय

कोल्हापुरात २४ ऑगस्टला ‘श्रावण व्रतवैकल्य’ उपक्रम; १०८ दाम्पत्य एकाचवेळी सोडणार उपवास

By Shivani - 8/22/2026 6:01:36 PM
Share This News:

श्रावण व्रतवैकल्य उपक्रमाचे २४ ऑगस्टला आयोजन; कोल्हापुरात १०८ दाम्पत्य एकाचवेळी सोडणार सामुदायिक उपवास

कोल्हापूर :

श्रावण महिन्याच्या दुसऱ्या सोमवारी, २४ ऑगस्ट २०२६ रोजी कोल्हापुरात ‘श्रावण व्रतवैकल्य’ या सामुदायिक उपवास सोडण्याच्या धार्मिक उपक्रमाचे आयोजन करण्यात आले आहे. समस्त हिंदुत्ववादी संघटना आणि आमदार राजेश क्षीरसागर फौंडेशनच्या वतीने गेल्या १३ वर्षांपासून हा उपक्रम आयोजित केला जात आहे. यंदाचा कार्यक्रम सायंकाळी ६ ते रात्री १० वाजेपर्यंत नष्टे लॉन, महावीर गार्डनजवळ, कोल्हापूर येथे होणार असल्याची माहिती पश्चिम महाराष्ट्र देवस्थान समितीच्या माजी कोषाध्यक्षा आणि भगिनी मंचच्या अध्यक्षा सौ. वैशाली राजेश क्षीरसागर यांनी दिली.

हिंदू धर्मातील सण, परंपरा आणि संस्कृतीची महती सर्वांपर्यंत पोहोचावी, तसेच धार्मिक जागृती आणि सामाजिक एकोपा वाढावा, या उद्देशाने हा उपक्रम सुरू करण्यात आला आहे. यंदाच्या कार्यक्रमाच्या नियोजनासाठी हिंदुत्ववादी संघटनांच्या पदाधिकाऱ्यांची बैठक शिवालय शिवसेना जिल्हा मध्यवर्ती कार्यालय, शनिवार पेठ, कोल्हापूर येथे पार पडली.

पंचगंगेतून कावडीने आणलेल्या जलाने जलाभिषेक

कार्यक्रमाच्या दिवशी हिंदुत्ववादी कार्यकर्त्यांकडून पंचगंगा नदीच्या तीरावरून कावडीने पाणी आणण्यात येणार आहे. या पवित्र जलाने श्री महादेवाच्या पिंडीसह छत्रपती शिवाजी महाराजांच्या प्रतिमेस जलाभिषेक करण्यात येणार आहे. त्यानंतर गोमाता पूजन, ध्वजवंदन आणि शस्त्रपूजन होणार आहे.

यानंतर ११ नवदाम्पत्यांच्या उपस्थितीत महायज्ञाला प्रारंभ होईल. हिंदू देवतांचे पूजन, भारतमातेचे पूजन आणि छत्रपती शिवाजी महाराजांची आरती झाल्यानंतर सामुदायिक उपवास सोडण्याचा मुख्य कार्यक्रम होणार आहे.

१०८ दाम्पत्य एकाचवेळी सोडणार उपवास

या उपक्रमाचे प्रमुख आकर्षण म्हणजे विविध जाती-पंथातील १०८ दाम्पत्य एकाचवेळी केळीच्या पानावर सात्विक भोजन करून आपला उपवास सोडणार आहेत. मंत्रघोषाच्या वातावरणात हा सामुदायिक उपवास सोडण्याचा कार्यक्रम पार पडणार आहे.

यावेळी इस्कॉनच्या वतीने भजन आणि कीर्तनाचे आयोजन करण्यात आले असून, आध्यात्मिक वातावरणात कार्यक्रम पार पडणार आहे.

नागरिकांना उपस्थित राहण्याचे आवाहन

हिंदू संस्कृती आणि परंपरा जपण्याच्या उद्देशाने या उपक्रमाची सुरुवात करण्यात आली असून, कोल्हापूर शहरातील नागरिक, हिंदुत्ववादी संघटनांचे पदाधिकारी व कार्यकर्ते, तालीम संस्था, मंडळांचे कार्यकर्ते आणि सकल हिंदू समाजातील नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.

नियोजन बैठकीला ज्येष्ठ हिंदुत्ववादी कार्यकर्ते बाबा वाघापूरकर, यादव महाराज, श्रीकांत पोतनीस, उदय भोसले, किशोर घाटगे, चंद्रकांत बराले, मधुकर नाझरे, निरंजन शिंदे, सुनील सामंत, कमलाकर किलकिले, विक्रम जरग, जी.जी. जोशी, विकास यादव, किरण दुसे, अर्जुन आंबी, श्रीमती पूजा भोर यांच्यासह सकल हिंदू समाज आणि विविध संघटनांचे पदाधिकारी उपस्थित होते.

कार्यक्रमाची ठळक माहिती :

• दिनांक : २४ ऑगस्ट २०२६, सोमवार
• वेळ : सायंकाळी ६ ते रात्री १०
• स्थळ : नष्टे लॉन, महावीर गार्डनजवळ, कोल्हापूर
• मुख्य उपक्रम : श्रावण व्रतवैकल्य सामुदायिक उपवास सोडणे
• विशेष सहभाग : १०८ दाम्पत्य
• धार्मिक विधी : जलाभिषेक, गोमाता पूजन, ध्वजवंदन, शस्त्रपूजन, महायज्ञ व आरती
• सांस्कृतिक कार्यक्रम : इस्कॉन भजन व कीर्तन