राजकीय

मनोज जरांगे पाटील यांचा एकनाथ शिंदेंना इशारा; 'एका फटक्यात संपाल'

By Shivani - 9/9/2026 4:55:46 PM
Share This News:

मनोज जरांगे पाटील यांचा उपमुख्यमंत्री एकनाथ शिंदेंना इशारा; 'भाषा आता आणखी तिखट होईल'

अंतरवाली सराटी :

उपमुख्यमंत्री एकनाथ शिंदे यांच्याविषयी एकेरी भाषा वापरू नये, असे आवाहन शिंदे गटातील मंत्र्यांकडून करण्यात आले होते. मात्र, मनोज जरांगे पाटील यांनी हे आवाहन स्पष्टपणे धुडकावून लावत उपमुख्यमंत्री एकनाथ शिंदे यांच्यावर पुन्हा एकदा आक्रमक शब्दांत टीका केली आहे. बुधवारी अंतरवाली सराटी येथे झालेल्या पत्रकार परिषदेत जरांगे पाटील यांनी शिंदे यांचा एकेरी उल्लेख करत, "शहाणे व्हा, नाहीतर एका फटक्यात संपाल," असा इशारा दिला.

मनोज जरांगे पाटील यांनी यावेळी उपमुख्यमंत्री एकनाथ शिंदे यांच्यासह त्यांच्या समर्थनार्थ भूमिका घेणारे मंत्री उदय सामंत आणि शंभूराज देसाई यांच्यावरही जोरदार टीका केली.

'माझी भाषा आता बदलणार नाही, आणखी तिखट होईल'

उपमुख्यमंत्री एकनाथ शिंदे यांना उद्देशून बोलताना जरांगे पाटील म्हणाले की, मराठ्यांना मराठ्यांच्या अंगावर सोडण्याचे राजकारण करू नका. वेळेत सुधारले नाही तर परिस्थिती गंभीर होईल, असा इशाराही त्यांनी दिला.

"माझी भाषा आता बदलणार नाही, तर यापेक्षा आणखी तिखट होईल," असे जरांगे पाटील यांनी ठणकावून सांगितले.

मंत्री उदय सामंतांवरही जरांगे आक्रमक

मंत्री उदय सामंत यांच्या भूमिकेवरही मनोज जरांगे पाटील यांनी प्रश्न उपस्थित केले. "आम्ही अजूनही संयम बाळगून आहोत," या सामंत यांच्या कथित वक्तव्यावर प्रतिक्रिया देताना जरांगे यांनी, "संयम नसला तर तू काय करणार आहेस?" असा सवाल केला.

तसेच उदय सामंत आणि संजय शिरसाट यांच्यावर छत्रपती संभाजीनगरमध्ये दंगल घडवण्यासंदर्भात फोनवर चर्चा केल्याचा गंभीर आरोपही जरांगे पाटील यांनी केला. मात्र, या आरोपांची स्वतंत्र पुष्टी झालेली नाही.

'मराठ्यांमध्ये दंगल घडवण्याचा प्रयत्न'

उपमुख्यमंत्री एकनाथ शिंदे आणि मंत्री उदय सामंत यांना मराठा समाजात आपापसांत संघर्ष निर्माण करायचा असून दंगल घडवण्याचा प्रयत्न केला जात असल्याचा आरोप जरांगे पाटील यांनी केला.

यावेळी त्यांनी मंत्री आणि आमदारांकडे गुंड असल्याचा गंभीर आरोपही केला. आपल्या समाजातील तरुणाला इजा झाल्यास तीव्र प्रतिक्रिया उमटेल, असा इशाराही त्यांनी दिला.

'शिंदेंची माया येते, आम्हाला समाजाची नाही का?'

उपमुख्यमंत्री एकनाथ शिंदे यांची बाजू घेणाऱ्या नेत्यांवर निशाणा साधताना जरांगे पाटील यांनी, "तुम्हाला शिंदेंची माया येते, आम्हाला समाजाची माया येत नसेल का?" असा सवाल केला.

मंत्री उदय सामंत आणि शंभूराज देसाई यांच्यावरही त्यांनी शेलक्या शब्दांत टीका केली. "तुम्ही एकनाथ शिंदेंचे समर्थक झालात म्हणून जातीला विसरणार का?" असा सवाल त्यांनी उपस्थित केला.

प्रमाणपत्र रद्द केल्याचा आरोप

मनोज जरांगे पाटील यांनी उपमुख्यमंत्री एकनाथ शिंदे आणि संजय शिरसाट यांनी संगनमत करून प्रमाणपत्र रद्द केल्याचा आरोपही केला. या आरोपांवर संबंधितांकडून काय प्रतिक्रिया येते, याकडे आता राजकीय वर्तुळाचे लक्ष लागले आहे.

दरम्यान, जरांगे पाटील यांच्या आक्रमक वक्तव्यांमुळे मराठा आरक्षणाच्या मुद्द्यावरून राज्यातील राजकीय वातावरण पुन्हा तापण्याची शक्यता निर्माण झाली आहे.