बातम्या

मराठा कुणबी विद्यार्थ्यांसाठी मोठी घोषणा परदेशी शिक्षणाचा संपूर्ण खर्च सरकार उचलणार

By Shivani - 4/8/2026 4:37:52 PM
Share This News:

सारथीची मोठी घोषणा! मराठा-कुणबी विद्यार्थ्यांच्या परदेशी शिक्षणाचा संपूर्ण खर्च राज्य सरकार उचलणार

मुंबई :

मराठा आणि कुणबी समाजातील विद्यार्थ्यांसाठी राज्य सरकारने मोठा निर्णय घेतला आहे. छत्रपती शाहू महाराज संशोधन, प्रशिक्षण व मानव विकास संस्था (सारथी) यांच्या परदेशी शिष्यवृत्ती योजनेत महत्त्वपूर्ण बदल करण्यात आला असून, शैक्षणिक शुल्कावरील कमाल मर्यादा हटवण्यात आली आहे. त्यामुळे पात्र विद्यार्थ्यांच्या परदेशातील उच्च शिक्षणाचा संपूर्ण खर्च राज्य सरकार उचलणार आहे.

यापूर्वी या योजनेअंतर्गत पदव्युत्तर अभ्यासक्रमासाठी ३० लाख रुपये आणि पीएचडीसाठी ४० लाख रुपयांपर्यंत आर्थिक सहाय्य दिले जात होते. मात्र, जगातील अग्रगण्य विद्यापीठांचे शुल्क या मर्यादेपेक्षा अधिक असल्याने उर्वरित खर्च विद्यार्थ्यांना किंवा त्यांच्या कुटुंबीयांना करावा लागत होता. नवीन निर्णयामुळे ही अडचण दूर होणार असून, अधिक विद्यार्थ्यांना परदेशात उच्च शिक्षणाची संधी उपलब्ध होणार आहे.

सारथी परदेशी शिष्यवृत्तीसाठी पात्रता
या योजनेचा लाभ घेण्यासाठी अर्जदार मराठा, कुणबी, कुणबी-मराठा किंवा मराठा-कुणबी प्रवर्गातील असणे आवश्यक आहे. तसेच, कुटुंबाचे वार्षिक उत्पन्न ८ लाख रुपयांपेक्षा कमी असावे.

याशिवाय, ज्या परदेशी विद्यापीठात प्रवेश घेतला जाणार आहे ते QS World University Rankings मधील टॉप २०० विद्यापीठांमध्ये असणे बंधनकारक आहे.

पदव्युत्तर आणि पीएचडीसाठी किती जागा?
सारथीच्या या योजनेअंतर्गत पदव्युत्तर अभ्यासक्रमासाठी ५० जागा आणि पीएचडीसाठी २५ जागा उपलब्ध आहेत.

अर्ज प्रक्रिया पूर्णपणे ऑनलाइन असून, इच्छुक विद्यार्थ्यांनी सारथीच्या अधिकृत संकेतस्थळावर अर्ज सादर करावा. आवश्यक कागदपत्रांची पडताळणी झाल्यानंतर पात्र विद्यार्थ्यांची निवड केली जाणार आहे.

या निर्णयामुळे परदेशात उच्च शिक्षणाचे स्वप्न पाहणाऱ्या मराठा-कुणबी समाजातील गुणवंत विद्यार्थ्यांना मोठा दिलासा मिळणार असून, आर्थिक अडचणीमुळे शिक्षण थांबवावे लागणाऱ्या विद्यार्थ्यांसाठी हा निर्णय महत्त्वाचा ठरणार आहे.