राजकीय

शिवसेना आमदार अपात्रता प्रकरणात कपिल सिब्बलांचा मोठा युक्तिवाद; ‘शिंदे गटातील आमदार अपात्र ठरतात’

By Shivani - 8/18/2026 4:42:28 PM
Share This News:

शिवसेना आमदार अपात्रता प्रकरण : ‘दहाव्या अनुसूचीनुसार शिंदे गटातील आमदार अपात्र ठरतात’; कपिल सिब्बल यांचा सर्वोच्च न्यायालयात युक्तिवाद

नवी दिल्ली :

शिवसेना पक्षातील फुटीप्रकरणी ठाकरे गटाने दाखल केलेल्या याचिकेवर सर्वोच्च न्यायालयात अंतिम टप्प्यात सुनावणी सुरू आहे. ठाकरे गटाचे ज्येष्ठ वकील कपिल सिब्बल यांनी आमदारांच्या अपात्रतेच्या मुद्द्यावर जोरदार युक्तिवाद करताना, दहाव्या अनुसूचीनुसार पक्ष सोडणाऱ्या आमदारांवर अपात्रतेची कारवाई होणे अपेक्षित असल्याचा दावा केला.

सिब्बल यांच्या युक्तिवादानुसार, दहाव्या अनुसूचीनुसार एखाद्या पक्षातील काही आमदार किंवा खासदारांनी पक्ष सोडल्यास ते अपात्र ठरू शकतात. मात्र, विधिमंडळ पक्षातील दोन-तृतीयांश सदस्यांनी दुसऱ्या पक्षात विलीन होण्याचा निर्णय घेतल्यास त्यांना संरक्षण मिळू शकते. शिवसेना फुटीच्या प्रकरणात मात्र शिंदे गटाने कोणत्याही दुसऱ्या पक्षात विलीन न होता ‘आम्हीच खरी शिवसेना’ असा दावा केला, यावर सिब्बल यांनी आक्षेप घेतला.

विधानसभा अध्यक्षांचा निर्णय आधी अपेक्षित होता?

शिवसेना फुटीनंतर निवडणूक आयोग आणि विधानसभा अध्यक्षांनी घेतलेल्या निर्णयांच्या क्रमावरही कपिल सिब्बल यांनी प्रश्न उपस्थित केला. आमदारांच्या अपात्रतेचा निर्णय विधानसभा अध्यक्षांनी आधी घ्यायला हवा होता आणि त्यानंतरच पक्षाची मान्यता व चिन्ह याबाबत निवडणूक आयोगाचा निर्णय अपेक्षित होता, असा युक्तिवाद त्यांनी केला. मात्र, शिवसेना प्रकरणात ही प्रक्रिया पाळण्यात आली नसल्याचा दावा सिब्बल यांनी केला.

राहुल नार्वेकरांच्या निर्णयावर ठाकरे गटाचा आक्षेप

एकनाथ शिंदे यांच्या बंडानंतर शिवसेनेत दोन गट निर्माण झाले. त्यानंतर विधानसभा अध्यक्ष राहुल नार्वेकर यांनी दोन्ही गटांतील आमदारांना अपात्र ठरवले नाही. तसेच शिंदे गटाच्या व्हिपची मान्यता कायम ठेवत शिंदे गटालाच विधिमंडळातील शिवसेना म्हणून मान्यता दिली. याच निर्णयावर ठाकरे गटाने सर्वोच्च न्यायालयात आव्हान दिले आहे. सिब्बल यांनी आपल्या युक्तिवादात विधानसभा अध्यक्षांचा निर्णय सर्वोच्च न्यायालयाच्या निर्देशांच्या अनुषंगाने चुकीचा असल्याचा दावा केला.

निवडणूक आयोगाच्या निर्णयावरही सवाल

शिवसेना पक्ष आणि धनुष्यबाण चिन्हाबाबत निवडणूक आयोगाने शिंदे गटाच्या बाजूने निर्णय दिला. या निर्णयालाही ठाकरे गटाने सर्वोच्च न्यायालयात आव्हान दिले आहे.

यापूर्वी कपिल सिब्बल यांनी निवडणूक आयोगाने आपल्या अधिकारक्षेत्राबाहेर जाऊन निर्णय घेतल्याचा युक्तिवाद केला होता. आता त्यांनी आमदारांच्या अपात्रतेचा मुद्दा न्यायालयासमोर मांडला.

‘त्यावेळी आमदार अपात्र ठरले असते तर पुढच्या गोष्टी घडल्या नसत्या’

सुनावणीदरम्यान त्या वेळच्या आमदारांचा कार्यकाळ आता संपला असल्याने त्यांच्या अपात्रतेच्या मुद्द्याचा सध्याच्या परिस्थितीवर काय परिणाम होईल, असा प्रश्न उपस्थित झाला. त्यावर सिब्बल यांनी, त्या वेळच्या आमदारांना अपात्र ठरवण्यात आले असते तर त्यानंतरच्या राजकीय घडामोडी घडल्याच नसत्या, असा युक्तिवाद केला.

ठाकरे गटाच्या मते, शिंदे यांच्यासोबत गेलेल्या आमदारांच्या अपात्रतेचा निर्णय झाल्यास शिवसेना पक्षावरील अधिकाराचा प्रश्नही त्यातून स्पष्ट होऊ शकतो.

शिवसेना फुटीप्रकरणी सर्वोच्च न्यायालयातील सुनावणी आता निर्णायक टप्प्यात असून, विधानसभा अध्यक्षांचा निर्णय, निवडणूक आयोगाचा निर्णय आणि दहाव्या अनुसूचीची व्याख्या यावर न्यायालयाचा निकाल काय येतो, याकडे महाराष्ट्राच्या राजकीय वर्तुळाचे लक्ष लागले आहे.