शैक्षणिक

🎓 राज्यातील सीईटी परीक्षा वर्षातून दोन वेळा; विद्यार्थ्यांना दिलासा देणारा निर्णय

By nisha patil - 12/11/2025 12:02:53 PM
Share This News:

मुंबई : राज्यातील विद्यार्थ्यांसाठी एक महत्त्वपूर्ण निर्णय घेण्यात आला आहे. राज्य सामाईक प्रवेश परीक्षा (CET) कक्षाकडून पीसीएम, पीसीबी आणि एमबीए या अभ्यासक्रमांच्या प्रवेश परीक्षा आता वर्षातून दोन वेळा घेतल्या जाणार आहेत, अशी माहिती उच्च व तंत्र शिक्षण मंत्री चंद्रकांत पाटील यांनी दिली.

मुंबईत झालेल्या आढावा बैठकीत या निर्णयावर शिक्कामोर्तब करण्यात आले. बैठकीला उच्च व तंत्रशिक्षण विभागाचे अपर मुख्य सचिव बी. वेणुगोपाल रेड्डी, सीईटी कक्षाचे आयुक्त दिलीप सरदेसाई, उच्च शिक्षण संचालक डॉ. शैलेंद्र देवळाणकर, तंत्रशिक्षण संचालक डॉ. विनोद मोहितकर आणि इतर वरिष्ठ अधिकारी उपस्थित होते.

नवीन नियोजनानुसार पहिली सीईटी परीक्षा एप्रिल २०२६ मध्ये आणि दुसरी परीक्षा मे २०२६ मध्ये घेतली जाईल. विद्यार्थ्यांसाठी पहिली परीक्षा देणे बंधनकारक, तर दुसरी परीक्षा ऐच्छिक असेल. जर विद्यार्थी दोन्ही परीक्षा देत असेल, तर जास्त गुणांची परीक्षा प्रवेश प्रक्रियेसाठी ग्राह्य धरली जाईल.

राज्यातील अभियांत्रिकी, फार्मसी, विधी, एमबीए आणि इतर व्यावसायिक अभ्यासक्रमांसाठी घेतल्या जाणाऱ्या सीईटीबाबत विद्यार्थ्यांकडून वारंवार मागणी होत होती की परीक्षा एकदाच घेतली जाते, त्यामुळे गुणांमध्ये सुधारणा करण्याची संधी मिळत नाही. त्यामुळे आता वर्षातून दोनदा परीक्षा घेण्याच्या निर्णयामुळे विद्यार्थ्यांना दुसरी संधी मिळणार असून ताणतणाव कमी होणार आहे.

या निर्णयामुळे राज्यातील हजारो विद्यार्थ्यांना दिलासा मिळेल आणि स्पर्धात्मक परीक्षेतील गुणवत्ता वाढण्यास हातभार लागेल, अशी अपेक्षा व्यक्त केली जात आहे.