बातम्या

*पारेवाडीच्या श्रीगणेश महिला दूध उत्पादकांची दिवाळी गोड

By nisha patil - 9/11/2026 2:25:44 PM
Share This News:

*पारेवाडीच्या श्रीगणेश महिला दूध उत्पादकांची दिवाळी गोड
 

 दूध संस्थेकडून प्रतिलिटर साडेपाच रुपये बोनससह भेटवस्तूंचे वाटप
 

*आजरा(हसन तकीलदार):- दिवाळी सणाचे औचित्य साधून श्री गणेश महिला सहकारी दूध व्यवसायिक संस्था मर्यादित, पारेवाडी यांच्यावतीने दूध उत्पादकांना प्रतिलिटर ५ रुपये ५० पैसे दराने दिवाळी बोनसचे वाटप करण्यात आले. बोनसबरोबरच दूध उत्पादकांना भेटवस्तू देऊन संस्थेने त्यांची दिवाळी अधिक आनंददायी केली. संस्थेच्या या उपक्रमामुळे दूध उत्पादकांमध्ये समाधानाचे वातावरण असून, संस्थेच्या निर्णयाचे परिसरातून कौतुक होत आहे.
 

ग्रामीण भागातील शेतकऱ्यांसाठी दुग्धव्यवसाय हा शेतीला पूरक आणि आर्थिक उत्पन्नाचा महत्त्वाचा स्रोत आहे. जनावरांचे संगोपन, पशुखाद्य, औषधोपचार आणि देखभाल यासाठी सातत्याने खर्च करावा लागतो. दूध उत्पादकांच्या या कष्टाची जाणीव ठेवून संस्थेने दिवाळीच्या निमित्ताने प्रतिलिटर ५.५० रुपये बोनस देण्याचा निर्णय घेतला आणि त्यानुसार प्रत्यक्ष बोनसचे वाटप केले असल्याची माहिती संस्थापक अनिल नार्वेकर यांनी बोलताना स्पष्ट केले. केवळ बोनस देऊन न थांबता संस्थेने दूध उत्पादकांना भेटवस्तू देत सणाचा आनंद द्विगुणित केला. दूध उत्पादकांच्या मेहनतीचा सन्मान करण्याबरोबरच त्यांच्या कुटुंबीयांच्या चेहऱ्यावर आनंद फुलविण्याचा संस्थेचा हा प्रयत्न विशेष कौतुकास्पद ठरला असल्याचेही नार्वेकर यांनी स्पष्ट केले.
 

महिला सहकाराच्या माध्यमातून ग्रामीण अर्थव्यवस्थेला बळकटी देण्याचे काम श्री गणेश महिला सहकारी दूध व्यवसायिक संस्था करीत आहे. दूध उत्पादक आणि संस्था यांच्यातील विश्वासाचे नाते अधिक दृढ करण्यासाठी संस्थेच्या माध्यमातून विविध उपक्रम राबविण्यात येत आहेत. संस्थेच्या चेअरमन सौ. उज्वला अनिल नार्वेकर व व्हाईस चेअरमन सौ. अर्चना गणेश निर्मळे यांच्या नेतृत्वाखाली दूध उत्पादकांच्या हिताला प्राधान्य देण्यात येत आहे. दिवाळीच्या निमित्ताने बोनस आणि भेटवस्तूंचे वाटप करून संस्थेने दूध उत्पादकांना आनंदाची अनोखी भेट दिली आहे.
 

यावेळी चेअरमन उज्वला नार्वेकर, व्हा. चेअरमन अर्चना निर्मळे, संचालक ललिता घेवडे,  रेखा निर्मळे, चैत्राली घेवडे, सुरेखा निर्मळे, प्रिया खानोलकर, स्वाती कुंभार, शेवंता निकम यासह सेक्रेटरी नामदेव उर्फ अनिल निकम व सभासद मोठ्या संख्येने उपस्थित होते. महिला सहकारी संस्थेच्या या उपक्रमामुळे पारेवाडी परिसरातील दूध उत्पादकांची दिवाळी अधिक गोड झाली असून, संस्थेच्या या उपक्रमाचे दूध उत्पादकांकडून समाधान व्यक्त केले जात आहे.