बातम्या

मित्रांकडून किरकोळ वादातून तरुणाला मारहाण; बेशुद्ध अवस्थेत रेल्वे रुळांवर फेकलं, ट्रेन अंगावरून गेली तरी तरुण चमत्कारिकरित्या बचावला!

By nisha patil - 2/12/2025 10:55:23 AM
Share This News:

मिरज / कोल्हापूर — किरकोळ वादातून मित्रांनी एक तरुणाला जबर मारहाण करून बेशुद्ध अवस्थेत रेल्वे रुळांवर टाकल्याची धक्कादायक घटना समोर आली आहे. याहून धक्कादायक म्हणजे, त्याच्यावरून ट्रेन गेल्यानंतरसुद्धा तो तरुण जीवंत बचावला आहे. पोलिसांनी चार जणांना अटक करून त्यांना पाच दिवसांची पोलिस कोठडी मिळाली आहे.

कोल्हापूर–मिरज रेल्वे मार्गालगत ही घटना घडली. ताज्या माहितीनुसार, तेजस अनिल जाधव (२४) हा मजूर वर्गातील तरुण आपल्या चार मित्रांसोबत दारू पित होता. तेजसने नुकतंच घेतलेल्या मोबाईलवर पाणी ओतून त्याची वॉटरप्रूफ क्षमता दाखवली. याच दरम्यान त्याने उरलेलं पाणी मित्रांवर उडवल्याने किरकोळ वाद निर्माण झाला.

वाद चिघळत गेला आणि चारही मित्रांनी तेजसला मारहाण सुरू केली. दगडाने डोक्यात घाव घालून त्याला बेशुद्ध केले. त्यानंतर जवळच्या रेल्वे रुळांवर फेकून तेथून पळ काढला. काही वेळातच त्या रुळांवरून एक ट्रेन गेली. तरीही तेजस चमत्कारिकरित्या बचावला. मात्र त्याचा एक पाय व एक हात गमवावा लागला.

पोलीस कारवाई

घटनेनंतर शुद्धीवर आलेल्या तेजसने दिलेल्या तक्रारीनुसार मिरज रेल्वे पोलिसांनी चारही आरोपींवर खुनाच्या प्रयत्नाचा गुन्हा दाखल केला आहे. आरोपींची नावे अशी —

• सागर राजू शेलार

• अर्जुन संजय मोरे

• आर्यन संजय शेलार

• मिलिंद भागोजी गावडे
  (सर्व रा. शाहाजी गंज झोपडपट्टी, कोल्हापूर)

पोलिसांनी चौघांना ताब्यात घेऊन न्यायालयात हजर केले असता पाच दिवसांची पोलिस कोठडी देण्यात आली.

दारूच्या नशेत झालेल्या किरकोळ वादातून एका तरुणाचा जीव घेण्याचा प्रयत्न झाल्याने परिसरात खळबळ उडाली आहे. रेल्वे रुळांवर जखमी अवस्थेत कोणाला सोडणे किती घातक ठरू शकते, याचे हे उदाहरण आहे. पोलिसांनी नागरिकांना अशा हिंसक घटनांची तात्काळ माहिती देण्याचे आवाहन केले आहे.