बातम्या

आदमापूर बाळूमामा मंदिरातील गैरव्यवहाराविरोधात रविवारचा घंटानाद मोर्चा — ट्रस्टींच्या भ्रष्ट कारभाराविरोधात भक्त संतप्त!

By nisha patil - 8/11/2025 12:59:31 PM
Share This News:

कोल्हापूर:- कोल्हापूरच्या आदमापूर येथील प्रसिद्ध बाळूमामा मंदिरात भ्रष्टाचार, गैरव्यवहार आणि ट्रस्टींच्या मनमानी कारभाराविरोधात भक्त आणि सेवेकरीवर्गाने तीव्र आंदोलन छेडण्याचा निर्णय घेतला आहे. येत्या रविवारी (९ नोव्हेंबर) घंटानाद मोर्चा काढण्यात येणार असून, या मोर्चात हजारो भक्त सहभागी होणार असल्याची माहिती आयोजकांनी दिली आहे.

भक्तांच्या म्हणण्यानुसार, मंदिरातील ट्रस्टच्या कार्यप्रणालीत अनेक अनियमितता असून ट्रस्टी स्वतःचे नियम बनवतात आणि आपल्या मर्जीने निर्णय घेतात. मंदिरातील निधीचा अपव्यय, नातेवाईकांना प्राधान्य देणे, तसेच पारदर्शकतेचा पूर्ण अभाव या गोष्टींविरोधात भक्तवर्ग उभा ठाकला आहे.

या पार्श्वभूमीवर आंदोलनकर्त्यांनी मागणी केली आहे की, बाळूमामा देवस्थानावर सरकारी प्रशासक नेमावा, ज्यामुळे मंदिराचा कारभार पारदर्शक, नियमबद्ध आणि जनतेच्या विश्वासास पात्र ठरेल. तसेच धर्मादाय आयुक्त कार्यालयाने तत्काळ तपास सुरू करून ट्रस्टची चौकशी करावी, अशी मागणीही करण्यात आली आहे.

घंटानाद मोर्चा मुधाळ तिट्टा ते बाळूमामा देवालय असा मार्ग घेणार असून, पोलिस प्रशासनाने सुरक्षेची सर्व तयारी सुरू केली आहे. भक्त आणि स्थानिक नागरिक मोठ्या संख्येने सहभागी होण्याची अपेक्षा व्यक्त केली जात आहे.

या आंदोलनामुळे आदमापूर आणि परिसरात चांगलीच खळबळ उडाली असून, राज्यातील धार्मिक ट्रस्टच्या व्यवस्थापनातील पारदर्शकतेचा प्रश्न पुन्हा एकदा चर्चेत आला आहे. आता प्रशासन या मागण्यांवर काय भूमिका घेते, याकडे सर्वांचे लक्ष लागले आहे.