खेळ

वर्ल्डकप सामने श्रीलंकेत घेण्याची बांगलादेशची मागणी; बीसीसीआयचा ठाम नकार

By nisha patil - 5/1/2026 1:47:42 PM
Share This News:

भारतामध्ये होणाऱ्या आगामी टी-२० वर्ल्डकप स्पर्धेतील आपले सामने भारतात न खेळता ते श्रीलंकेत आयोजित करण्यात यावेत, अशी मागणी बांगलादेश क्रिकेट बोर्डाने (BCB) केली आहे. मात्र, स्पर्धेला अवघा महिनाभराचा कालावधी शिल्लक असताना सामन्यांचे स्थळांतर करणे व्यावहारिक तसेच प्रशासकीयदृष्ट्या अशक्य असल्याचे स्पष्ट करत भारतीय क्रिकेट नियामक मंडळाने (BCCI) ही मागणी ठामपणे फेटाळून लावली आहे.
बीसीसीआयच्या माहितीनुसार, श्रीलंकेत आधीच आंतरराष्ट्रीय सामन्यांचे नियोजन निश्चित झाले असून, ऐनवेळी सामने हलविल्यास मैदानांची उपलब्धता, सुरक्षा व्यवस्था, प्रसारण हक्क, तिकिटविक्री आणि संघांच्या प्रवासासंबंधी मोठ्या लॉजिस्टिक अडचणी निर्माण होऊ शकतात. वर्ल्डकपसारख्या जागतिक स्पर्धेत अशा प्रकारचा बदल करणे व्यवहार्य नाही, असे बीसीसीआयने स्पष्ट केले आहे.
दरम्यान, बांगलादेशमध्ये भारताविरोधातील वातावरण तणावपूर्ण असल्याचे चित्र आहे. भारतात आयपीएलमध्ये सहभागी असलेल्या काही बांगलादेशी क्रिकेटपटूंना अडचणी येत असल्याचा दावा करत, अशा परिस्थितीत राष्ट्रीय संघ भारत दौऱ्यावर सुरक्षित कसा राहील, असा प्रश्न बांगलादेश क्रिकेट बोर्डाने उपस्थित केला आहे. खेळाडूंच्या सुरक्षेबाबत कोणतीही तडजोड केली जाणार नाही, अशी भूमिका बीसीबीने घेतली आहे.
या संपूर्ण प्रकरणावर आंतरराष्ट्रीय क्रिकेट परिषद (ICC) अद्याप कोणतीही अधिकृत भूमिका जाहीर केलेली नाही. त्यामुळे वर्ल्डकपच्या आयोजनासंदर्भात अनिश्चिततेचे सावट कायम असून, पुढील काही दिवसांत आयसीसीकडून निर्णय अपेक्षित आहे