बातम्या

पुणे पदवीधर निवडणुकीत भैय्या माने यांच्या शक्तिप्रदर्शनाची चर्चा

By nisha patil - 6/10/2026 9:28:41 PM
Share This News:

पुणे पदवीधर निवडणुकीत भैय्या माने यांच्या शक्तिप्रदर्शनाची चर्चा

सर्वसामान्य पदवीधर हाच माझा पक्ष! प्रताप ऊर्फ भैय्या माने यांचे भावनिक आवाहन 

 पुणे पदवीधर मतदारसंघात चर्चेत असणारे प्रताप ऊर्फ भैय्या माने यांनी आज उमेदवारी अर्ज दाखल केला अनेक उमेदवार साध्या पद्धतीने अर्ज दाखल करत असताना मात्र दुसरीकडे भैय्या माने यांचा अर्ज दाखल करण्यासाठी प्रचंड गर्दी दिसून आली 

 पुणे पदवीधर मतदारसंघाच्या निवडणुकीत अपक्ष उमेदवार म्हणून प्रताप उर्फ भैय्या माने यांनी आज जोरदार शक्तिप्रदर्शन करत आपला उमेदवारी अर्ज दाखल केला. 
कोल्हापूर, सांगली, सातारा सोलापूर आणि पुणे या चार जिल्ह्यांमध्ये पदवीधर मतदारांच्या नोंदणीच्या प्रक्रियेत गेल्या पंधरा वर्षांपासून सक्रियपणे काम करत असल्याचा दावा भैय्या माने यांनी केला. पदवीधरांची नोंदणी, त्यांच्या प्रश्नांसाठी केलेले काम आणि सातत्याने पदवीधरांशी असलेला संपर्क हीच आपली राजकीय ताकद असल्याचे भैय्या माने यांनी सांगितले.

उमेदवारी अर्ज दाखल केल्यानंतर माध्यमांशी संवाद साधताना भैय्या माने म्हणाले, **“माझा पक्ष हा आता पदवीधरांचा पक्ष आहे. मी सर्वसामान्य पदवीधरांचा पुढारी आहे. गेल्या पंधरा वर्षांपासून पदवीधर नोंदणी आणि या संपूर्ण प्रक्रियेत मी काम करत आहे.

यावेळी उमेदवारी अर्ज दाखल करण्यासाठी जमलेली गर्दी ही पुणे पदवीधर निवडणुकीच्या इतिहासातील ऐतिहासिक गर्दी असल्याचा दावाही त्यांनी केला. पदवीधरांनी स्वयंस्फूर्तीने दिलेला प्रतिसाद हीच आपल्या उमेदवारीची खरी ताकद असल्याचे माने यांनी स्पष्ट केले.

महायुतीच्या उमेदवारीवरही भाष्य

दरम्यान, महायुतीकडून आपल्याला किंवा शरद लाड यांना उमेदवारी मिळेल, अशी अपेक्षा होती, असे भैय्या माने यांनी सांगितले. मात्र अचानक नवीन नाव पुढे आल्याने आपण आश्चर्यचकित झाल्याचे त्यांनी स्पष्ट केले.
शरद लाड यांना अचानक उमेदवारीपासून डावलले जाणे, प्रवेश करूनही त्यांना संधी न मिळणे हे त्यांच्यासाठी निश्चितच धक्कादायक आहे असे माने म्हणाले.

आपली भूमिका सध्या अपक्षाची असली तरी पक्षातील वरिष्ठ नेत्यांकडून आपल्याबद्दल सकारात्मक भूमिका असल्याचेही त्यांनी सांगितले. यावेळी त्यांनी दिवंगत नेत्यांच्या आठवणींना उजाळा देत भावनिक भाष्य केले.

माझी अपक्षाची भूमिका असली तरी अजित दादांच्या मनात माझ्याबद्दल खूप सकारात्मक भूमिका होती. मात्र ते आज आपल्यात नाहीत, हे दुर्दैव आहे अशी भावना त्यांनी व्यक्त केली 

पुणे पदवीधर मतदारसंघातील तरुण, शिक्षित आणि सर्वसामान्य पदवीधरांचे प्रश्न सभागृहात मांडण्याचा निर्धार त्यांनी व्यक्त केला. रोजगार, शिक्षण, स्पर्धा परीक्षा, स्थानिक पातळीवर रोजगाराच्या संधी आणि पदवीधरांच्या भवितव्याशी संबंधित प्रश्नांना प्राधान्य देणार असल्याचे त्यांनी सांगितले.

गेल्या अनेक वर्षांपासून पदवीधर मतदारांच्या संपर्कात राहून केलेले काम आणि या निवडणुकीत पदवीधरांकडून मिळणारा प्रतिसाद यामुळे आपण विजयाबाबत आशावादी असल्याचे माने यांनी स्पष्ट केले.अखेर आत्मविश्वास व्यक्त करताना ते म्हणाले, *“मी स्वाभिमानी पदवीधरांच्या जीवावर नक्कीच आमदार होईन.”*

भैय्या माने यांच्या या शक्तिप्रदर्शनामुळे पुणे पदवीधर मतदारसंघातील निवडणुकीची रंगत वाढली असून, अपक्ष उमेदवार म्हणून त्यांना मिळणारा पदवीधरांचा प्रतिसाद आगामी निवडणुकीत कितपत निर्णायक ठरतो, याकडे आता राजकीय वर्तुळाचे लक्ष लागले आहे.अर्ज दाखल करत असताना “ दादांच्या मनातील आमदार “ हे फलक लक्षवेधी ठरत होते