विशेष बातम्या

“कोल्हापुर - ‘ग्रोबझ’चा २८० कोटींचा घोटाळा: चार्जशीट फक्त १२ कोटींवर — सर्किट बेंचने तपास अधिकाऱ्यांचा मागा घेतला”

By nisha patil - 6/12/2025 12:39:27 PM
Share This News:

कोल्हापूर : ‘ग्रोबझ ट्रेडिंग सर्व्हिसेस’ या संस्थेने गुंतवणूकदारांना उच्च परताव्याचे आमिष दाखवून तब्बल २८० कोटींची फसवणूक केल्याचा आरोप होत असताना, पोलिसांनी दाखल केलेल्या आरोपपत्रात मात्र केवळ १२ कोटींचा उल्लेख करण्यात आल्याने कोल्हापूर सर्किट बेंचने तपास अधिकाऱ्यांची चांगलीच कसून चौकशी केली.

गुंतवणूकदारांच्या तक्रारीनुसार कंपनीने 2021 ते 2022 या कालावधीत विविध योजनांच्या नावाखाली मोठ्या प्रमाणात रक्कम जमा केली. मात्र, दाखल चार्जशीटमध्ये फसवणुकीची रक्कम प्रत्यक्ष तक्रारीपेक्षा कितीतरी कमी दाखवण्यात आली आहे, हे न्यायालयाच्या निदर्शनास आल्यानंतर तपासातील विसंगतीबद्दल न्यायालयाने गंभीर नाराजी व्यक्त केली.

तपासात आवश्यक समन्वयाचा अभाव, आर्थिक व्यवहारांचा अपुरा तपास आणि आरोपींच्या मालमत्तेच्या जप्तीबाबत स्पष्ट माहिती नसल्याचे न्यायालयाने निर्देशित केले. या पार्श्वभूमीवर सर्किट बेंचने तपास अधिकाऱ्यांना न्यायालयात हजर राहून संपूर्ण तपासाचा सविस्तर अहवाल सादर करण्याचे आदेश दिले आहेत.

गुंतवणूकदारांच्या पैशाचा मागोवा घेऊन प्रत्यक्ष फसवणुकीची रक्कम, आरोपींची जबाबदारी आणि जप्त केलेल्या मालमत्तेचा तपशील तातडीने स्पष्ट करावा, अशी सूचना न्यायालयाने केली असून या प्रकरणात पुढील सुनावणीदरम्यान अधिक तपशील समोर येणार आहे.