बातम्या

आजऱ्यात डॉ. नानासाहेब धर्माधिकारी प्रतिष्ठानतर्फे निर्माल्य संकलन उपक्रम यशस्वी

By nisha patil - 3/9/2025 11:39:38 AM
Share This News:

आजऱ्यात डॉ. नानासाहेब धर्माधिकारी प्रतिष्ठानतर्फे निर्माल्य संकलन उपक्रम यशस्वी 

आजरा :-(हसन तकीलदार):   डॉ. श्री नानासाहेब धर्माधिकारी प्रतिष्ठानतर्फे आ. पद्मश्री डॉ. श्री अप्पासाहेब धर्माधिकारी व रायगड भूषण डॉ. श्री सचिनदादा धर्माधिकारी यांच्या मार्गदर्शनाखाली श्री गणेश चतुर्थी व गौरी विसर्जनानिमित्त बेळगाव, संकेश्वर, निपाणी, गडहिंग्लज, आजरा आणि चंदगड येथे निर्माल्य संकलन व व्यवस्थापन उपक्रम यशस्वीरित्या संपन्न झाला.

या उपक्रमासाठी निपाणी, संकेश्वर, गडहिंग्लज, आजरा, चंदगड व बेळगाव भागातील एकूण ३०० श्री सदस्य सकाळी ११ ते रात्री १० या वेळेत कार्यरत होते. हिरण्यकेशी नदी घाटावर स्वयंसेवकांनी भाविकांकडून निर्माल्य गोळा करून वाहनात भरण्याचे काम केले. या उपक्रमाला गणेशभक्तांनी उत्स्फूर्त प्रतिसाद दिला.

सहा ठिकाणी एकाच वेळी ही मोहीम राबवण्यात आली असून, एकूण ३६ टन निर्माल्य गोळा करण्यात आले. हे सर्व निर्माल्य प्रतिष्ठानच्या मार्गदर्शनाखाली प्रक्रिया करून खतामध्ये रुपांतरित केले जाते. तयार झालेल्या खताचा उपयोग महाराष्ट्र व कर्नाटकातील वृक्षलागवड प्रकल्पांत केला जातो.

डॉ. नानासाहेब धर्माधिकारी हे एक महान समाजसुधारक असून त्यांनी सामाजिक प्रबोधनाचा पाया रचला. त्यांच्या स्मरणार्थ २०१० मध्ये स्थापन झालेल्या प्रतिष्ठानमार्फत सामाजिक प्रबोधन, व्यसनमुक्ती, वृक्षारोपण, भूजल पुनर्भरण, रक्तदान, आरोग्य जागृती शिबिरे, निर्माल्य संकलन व कंपोस्टिंग, अंधश्रद्धा निर्मूलन आणि प्रौढ साक्षरता असे विविध सामाजिक उपक्रम राबवले जात आहेत.

या कार्यासाठी पद्मश्री डॉ. अप्पासाहेब धर्माधिकारी यांना “द लिव्हिंग लिजेंड”, तर डॉ. सचिनदादा धर्माधिकारी यांना “द ग्लोबल लीडर” ही पदवी प्रदान करण्यात आली आहे.
“Where there is need for the society, we are working in that field” – या ब्रीदवाक्याप्रमाणे प्रतिष्ठानचे सदस्य समाजोपयोगी कार्यात नेहमीच उत्स्फूर्त सहभाग नोंदवतात.