बातम्या

‘विवेकानंद’ मध्ये नशामुक्त्‍ भारत अभियान आयोजन व एन.एस.एस.वर्धापन दिन साजरा

By nisha patil - 9/24/2025 3:33:12 PM
Share This News:

‘विवेकानंद’ मध्ये  नशामुक्त्‍  भारत अभियान आयोजन व  एन.एस.एस.वर्धापन दिन साजरा

 कोल्हापूर दि.24 : विद्यार्थ्यांमध्ये श्रमप्रतिष्ठा व नेतृत्वगुण विकास करण्यासाठी राष्ट्रीय सेवा योजना महत्वाची आहे. 

या योजनेच्या माध्यमातून विद्यार्थी समाजप्रिय होऊ शकतो. या योजनेतून काम करताना विद्यार्थ्यांना स्वच्छता, समाजप्रबोधन, रक्तदान, शासनाच्या विविध उपक्रमाची माहिती देणे, अंधश्रध्दा निर्मुलन इत्यादी कामे  समाजासाठी करता येतात.  विद्यार्थ्यानी गांजा, मावा, गुटखा व उत्तेजीत द्रव्य इ. पासून दूर राहून राष्ट्रीय सेवा योजनेच्या माध्यमातून समाजाला व्यसनाच्या दुष्परिणामाची जनजागृती करावी.   असे प्रतिपादन  शिवाजी विद्यापीठाच्या  राष्ट्रीय सेवा योजनेचे  संचालक, डॉ.टी.एम.चौगुले यांनी एन.एस.एस.च्या वर्धापन दिन व नशामुक्त अभियान या कार्यक्रमात केले.  कार्यक्रमाच्या अध्यक्षस्थानी प्राचार्य डॉ.आर.आर.कुंभार हे होते.

अध्यक्षीय मनोगतात प्राचार्य डॉ.आर.आर.कुंभार म्हणाले, महाविद्यालयाचे काम करत समाजापर्यंत पोहोचण्यासाठी रा.से.योजनेचे कार्य उपयोगी पडते.  एन.एस.एस. च्या माध्यमातून विद्यार्थ्यांमध्ये स्वयंशिस्त निर्माण्‍ होते. माणसाला माणसाशी माणसा सारखे जगायला एन.एस.एस. शिकवते श्रमाची प्रतिष्ठा जपल्यामुळे शिस्त, स्वावलंबन इत्यादीमुळे बलवान राष्ट्राची निर्मिती युवा शक्तीद्वारे केली जाते.

कार्यक्रमाची सुरुवात रोपास पाणी घालून व शिक्षणमहर्षी डॉ. बापूजी साळुंखे रचित संस्था प्रार्थनेने झाली. समारंभाचे स्वागत व प्रास्ताविक राष्ट्रीय सेवा योजनेचे कार्यक्रम अधिकारी प्रा. पी.आर.बागडे यानी केले,  प्रा. हेमंत पाटील यांनी आभार मानले. कु. साक्षी क्षिरसागर यांनी सूत्रसंचालन केले.  पाहुण्यांची ओळख डॉ.बी.टी.दांगट यांनी केली. नशामुक्त अभियानाची शपथ प्रा. ए. बी. वसेकर यांनी विद्यार्थ्यांना दिली.

  कार्यक्रमास डॉ संदीप पाटील, डॉ. राजश्री पाटील, प्राध्यापक  व स्वयंसेवक मोठ्या संख्येने उपस्थित होते.