बातम्या

गुणवत्तावाढीसाठी इंग्लिश शाळांनी अधिक प्रयत्न करावेत – पालकमंत्री

By nisha patil - 10/9/2025 5:30:04 PM
Share This News:

गुणवत्तावाढीसाठी इंग्लिश  शाळांनी अधिक प्रयत्न करावेत – पालकमंत्री 

अध्यक्ष के डी पाटील यांनी कार्यक्रमाचे उद्दिष्ट केले स्पष्ट...

जिल्ह्यातील इंग्रजी माध्यमांच्या शाळांकडे पालकांचा वाढता कल लक्षात घेता, “या शाळांनी केवळ संख्या वाढविण्यावर न थांबता गुणवत्तावाढीसाठी अधिकाधिक प्रयत्न करणे आवश्यक आहे”, असे प्रतिपादन पालकमंत्री प्रकाश आबिटकर यांनी केले.

शिक्षक दिनानिमित्त इंग्लिश मीडियम स्कूल्स असोसिएशन (IMSA) कोल्हापूरतर्फे हॉटेल सयाजी येथे आयोजित कार्यक्रमात ते बोलत होते. या कार्यक्रमात शैक्षणिक क्षेत्रात उल्लेखनीय कामगिरी करणाऱ्या तब्बल ४९ मुख्याध्यापक व शिक्षकांना ‘IMSA Inspire Award’ देऊन सन्मानित करण्यात आले.

या वेळी अध्यक्षस्थानी इमसाचे अध्यक्ष व अंबूबाई पाटील इंग्लिश मीडियम स्कूलचे प्राचार्य के. डी. पाटील सर होते. त्यांनी मान्यवरांचे स्वागत करून कार्यक्रमाचे उद्दिष्ट स्पष्ट केले.

पालकमंत्री आबिटकर म्हणाले, “खासगी शाळांमधील शिक्षक कमी पगारातही सुटाबुटात येऊन घसा फोडून शिकवतात. शासकीय शाळांतील शिक्षकांनीही त्यांचा आदर्श घ्यायला हवा.” खासगी शाळांच्या अडचणी सोडविण्यासाठी लवकरच बैठक आयोजित करण्याचे आश्वासनही त्यांनी दिले.

या कार्यक्रमाला प्राथमिक शिक्षणाधिकारी मीना शेंडकर, माध्यमिक शिक्षणाधिकारी सुवर्णा सावंत, IMSA चे राज्य सचिव प्रभाकर हेरवाडे यांच्यासह असोसिएशनचे पदाधिकारी, शिक्षक आणि मान्यवर मोठ्या संख्येने उपस्थित होते.