बातम्या

धर्मादाय संस्थेचा आर्थिक गैरव्यवहार? राजू शेट्टींचा गंभीर आरोप

By nisha patil - 8/10/2025 4:19:00 PM
Share This News:

धर्मादाय संस्थेचा आर्थिक गैरव्यवहार? राजू शेट्टींचा गंभीर आरोप

पूर्व खासदार आणि स्वाभिमानी पक्षाचे अध्यक्ष राजू शेट्टी यांनी पुण्यातील शेठ हिराचंद नेमचंद स्मारक ट्रस्टच्या जमिनी विक्रीसंबंधी गंभीर आरोप केले आहेत. शेट्टी यांच्या मते, १९५८ साली स्थापन झालेल्या या सार्वजनिक न्यास संस्थेच्या पुणे, शिवाजीनगर मॉडेल कॉलनी येथील तीन एकर जमिनीची ३११ कोटी रुपयांमध्ये गोखले बिल्डर्सकडे विक्री करण्यास राज्याचे धर्मादाय आयुक्त श्री अमोघ कलोती यांनी मान्यता दिली आहे.

शेट्टी यांनी सांगितले की, या व्यवहारात ट्रस्टला २३० कोटी रुपये व ५२,००० चौ. फूट बांधकामाचा हक्क मिळणार असल्याचे ठरले, ज्याचा किमान १५०० कोटी रुपयांचा फायदा गोखले बिल्डर्सकडे जाण्याची शक्यता आहे. याचा अर्थ ट्रस्टला सरळ आर्थिक नुकसान होणार आहे.

राजू शेट्टींच्या आरोपानुसार, ट्रस्टच्या डीडमध्ये जमिनीची विक्री करण्यास मुभा नसतानाही ही मंजुरी देण्यात आली, तसेच पुणे मनपा मध्ये खोट्या कागदपत्रांचा वापर करून बांधकाम परवाने मिळवण्याचा प्रयत्न होत असल्याचे त्यांनी म्हटले.

शेट्टी यांनी चेतावणी दिली की, जर हे सर्व व्यवहार थांबवले गेले नाहीत, तर धर्मादाय आयुक्तांच्या मुंबई कार्यालयाबाहेर जोरदार आंदोलन केले जाईल.

त्यांनी स्पष्ट केले की, हा सर्व व्यवहार अत्यंत बोगस पद्धतीने केला गेला आहे आणि तातडीने हा व्यवहार रद्द केला जावा.