ताज्या बातम्या

आंतरजातीय, आंतरधर्मीय विवाह करणाऱ्यांसाठी शासनाकडून ‘सुरक्षागृह’ स्थापन करण्याचा निर्णय

By nisha patil - 10/30/2025 10:57:14 AM
Share This News:

 कोल्हापूर:-  आंतरजातीय आणि आंतरधर्मीय विवाह करणाऱ्या जोडप्यांना होणारा विरोध, मानसिक त्रास आणि सामाजिक दडपण यामुळे निर्माण होणारी असुरक्षिततेची भावना लक्षात घेऊन राज्य शासनाने एक महत्त्वाचा निर्णय घेतला आहे. अशा जोडप्यांसाठी सुरक्षित आश्रयस्थान म्हणून ‘सुरक्षागृह’ स्थापन करण्यात येणार आहे.

या सुरक्षागृहात जोडप्यांना तात्पुरता निवारा, कायदेशीर सल्ला, समुपदेशन आणि पोलिस सुरक्षा मिळणार आहे. घरच्यांचा किंवा समाजाचा तीव्र विरोध सहन करत असलेल्या जोडप्यांना या उपक्रमामुळे दिलासा मिळेल, असा शासनाचा विश्वास आहे.

सर्वोच्च न्यायालयाच्या निर्देशानुसार राज्यातील प्रत्येक जिल्ह्यात विशेष कक्ष (Special Cell) स्थापन करण्यात आला आहे. या कक्षाच्या अध्यक्षस्थानी पोलिस आयुक्त, उपायुक्त किंवा जिल्हा पोलीस अधीक्षक असतील. तसेच जिल्हा समाजकल्याण अधिकारी हे सदस्य आणि जिल्हा महिला व बाल विकास अधिकारी सदस्य सचिव म्हणून कार्य करतील.

राज्य शासनाने या योजनेअंतर्गत मानक कार्यप्रणाली (Standard Operating Procedure) जाहीर केली आहे. तक्रार घेऊन येणाऱ्या जोडप्यांचा धोका लक्षात घेऊन त्यांना तातडीने सुरक्षा उपलब्ध करून देण्याच्या सूचना देण्यात आल्या आहेत.

यासोबतच, राज्य व जिल्हा विधी सेवा प्राधिकरणांद्वारे अशा जोडप्यांना मोफत कायदेशीर मदत, समुपदेशन आणि विवाह नोंदणीसाठी सहाय्य मिळणार आहे.

या निर्णयामुळे आंतरजातीय आणि आंतरधर्मीय विवाह करणाऱ्यांच्या सुरक्षिततेसाठी एक सकारात्मक आणि संवेदनशील पाऊल उचलले गेल्याचे मानले जात आहे.