बातम्या

वीज पडून मृत्यू झालेल्या म्हाकवेतील तरुण शेतकऱ्याच्या कुटुंबीयांना शासनाकडून चार लाखाची मदत.....

By nisha patil - 2/11/2026 6:18:38 PM
Share This News:

वीज पडून मृत्यू झालेल्या म्हाकवेतील तरुण शेतकऱ्याच्या कुटुंबीयांना शासनाकडून चार लाखाची मदत.....

युवा शेतकऱ्याच्या कुटुंबीयांवर आघात....

दुःखाच्या प्रसंगी शासनाचा मदतीचा हात;

वैद्यकीय शिक्षण मंत्री नामदार हसन मुश्रीफ यांच्या हस्ते मंजुरी पत्राचे वाटप....

कागल दि 2 : म्हाकवे येथील युवा शेतकरी कै. रणजित सिद्राम पाटील यांचा वीज पडून दुर्दैवी मृत्यू झाल्याच्या घटनेने संपूर्ण गावावर दुःखाचा डोंगर कोसळला होता. कुटुंबातील तरुण आधार हरपल्याने पाटील कुटुंबावर ओढवलेल्या या संकटातून सावरणे अत्यंत कठीण झाले आहे. या दुःखद प्रसंगी शासनाकडून त्यांच्या कुटुंबीयांना चार लाख रुपयांची आर्थिक मदत मंजूर करण्यात आली आहे.

दिनांक १७ ऑक्टोबर २०२६ रोजी रणजित सिद्राम पाटील यांच्या अंगावर वीज पडून त्यांचा दुर्दैवी मृत्यू झाला होता. या घटनेनंतर नैसर्गिक आपत्तीमुळे झालेल्या मनुष्यहानीसाठी शासनाच्या नियमानुसार त्यांच्या कुटुंबीयांना आर्थिक मदत मिळावी यासाठी कार्यवाही करण्यात आली.

याबाबत महाराष्ट्र शासनाच्या महसूल व वन विभागाच्या शासन निर्णयानुसार तसेच जिल्हाधिकारी कोल्हापूर यांच्या आदेशान्वये कागलचे तहसीलदार कार्यालय यांनी कै. रणजित पाटील यांच्या वारसांना चार लाख रुपये (₹४,००,०००/-) इतकी मदत मंजूर केली आहे. याबाबतचे अधिकृत मंजुरी पत्र दिनांक २ नोव्हेंबर २०२६ रोजी वैद्यकीय शिक्षण मंत्री नामदार हसन मुश्रीफ यांच्या हस्ते वाटप करण्यात आले.

एखाद्या कुटुंबातील तरुण कर्त्या व्यक्तीचे अशा दुर्दैवी घटनेत निधन होणे, ही कधीही भरून न निघणारी हानी आहे. पैशाने माणसाची उणीव भरून निघू शकत नाही किंवा कुटुंबीयांचे दुःख कमी होऊ शकत नाही. मात्र अशा कठीण प्रसंगी शासनाकडून मिळणारी आर्थिक मदत कुटुंबाला काही प्रमाणात आधार देणारी ठरते.

चौकट : मुश्रीफ फाउंडेशनचीही मदत....

दुःखाचा डोंगर कोसळलेल्या या कुटुंबीयांचे मंत्री श्री. हसन मुश्रीफ यांनी भेटून सांत्वन केले होते. तसेच या कुटुंबियांच्या सर्वतोपरी पाठीशी राहण्याचा दिलासा त्यांनी दिला होता. नामदार हसन मुश्रीफ फाउंडेशनचे अध्यक्ष नवीद मुश्रीफ यांनी भेटून एक लाख रुपयांचा धनादेश या कुटुंबियांना दिला होता.

यावेळी मंत्री श्री. मुश्रीफ म्हणाले, दुःखाची भरपाई कधीच होऊ शकत नाही; मात्र संकटाच्या काळात मिळालेला मदतीचा हात कुटुंबासाठी मोठा आधार ठरतो. या मंजूर मदतीमुळे दुःखाच्या काळात पाटील कुटुंबाला आर्थिक हातभार लाभणार आहे. रणजित यांच्या आठवणी कायम जपताना त्यांच्या कुटुंबीयांना या कठीण प्रसंगातून सावरण्याचे बळ मिळो.

यावेळी तहसीलदार अमरदीप वाकडे, वडील सिद्राम मारूती पाटील, आई सौ. आक्काताई सिद्राम पाटील, बहिण सौ. प्रियांका पाटील, माजी उपसरपंच रमेश पाटील, जीवन कांबळे, कुलदीप गवंडी, विजय पाटील, आदी उपस्थित होते.