व्यवसाय

चितळे बंधू व्हिजन पार्कचे भव्य उद्घाटन; जागतिक खाद्यब्रँडकडे महाराष्ट्राची दमदार वाटचाल

By nisha patil - 4/17/2026 12:42:09 PM
Share This News:

चितळे बंधू व्हिजन पार्कचे भव्य उद्घाटन; जागतिक खाद्यब्रँडकडे महाराष्ट्राची दमदार वाटचाल

देवेंद्र फडणवीस यांच्या हस्ते रांजे येथे उभारण्यात आलेल्या ‘चितळे बंधू व्हिजन पार्क’चे उद्घाटन होताच महाराष्ट्राच्या खाद्यउद्योगाला जागतिक स्तरावर नेण्याच्या दिशेने एक महत्त्वाचा टप्पा गाठला गेला आहे. पारंपरिक चवीला आधुनिक तंत्रज्ञानाची जोड देत ‘लोकल ते ग्लोबल’ या संकल्पनेला मूर्त रूप देणाऱ्या या प्रकल्पाने उद्योगविश्वात नवे मापदंड निर्माण केले आहेत.

कार्यक्रमात बोलताना मुख्यमंत्री फडणवीस यांनी चितळे बंधूंच्या दूरदृष्टीचे कौतुक करत, महाराष्ट्रातील खाद्यउद्योगाला आंतरराष्ट्रीय दर्जा मिळवून देण्यासाठी शासन पूर्ण सहकार्य करेल, अशी ग्वाही दिली. ‘फूड ही सॉफ्ट पॉवर आहे’ असे सांगताना त्यांनी भारतीय खाद्यसंस्कृतीच्या विविधतेवर प्रकाश टाकत, जागतिक बाजारपेठेत स्थान मिळवण्यासाठी दर्जा, स्वच्छता आणि मानकांचे पालन अत्यावश्यक असल्याचे अधोरेखित केले.

व्हिजन पार्कमध्ये अत्याधुनिक, मानवी हस्तक्षेपविरहित यंत्रणा उभारण्यात आली असून, परदेशी तंत्रज्ञानात आवश्यक बदल करून ती स्थानिक गरजांनुसार विकसित करण्यात आली आहे. नूतनीकरणीय ऊर्जेचा वापर, उत्पादन प्रक्रियेतील पारदर्शकता आणि निरीक्षणासाठी उभारलेली गॅलरी ही या प्रकल्पाची वैशिष्ट्ये ठरत आहेत. या माध्यमातून ग्राहक, वितरक तसेच विद्यार्थी वर्गाला उत्पादन प्रक्रियेचा प्रत्यक्ष अनुभव घेण्याची संधी उपलब्ध होणार आहे.चार पिढ्यांच्या अथक प्रयत्नातून उभा राहिलेला ‘चितळे बंधू’ हा ब्रँड आज ३५ देशांपर्यंत पोहोचला असून, त्यामागे गुणवत्ता आणि विश्वासाची भक्कम परंपरा आहे. पुणेकरांच्या मनात घर केलेल्या या ब्रँडने आता जागतिक स्तरावर महाराष्ट्रीयन खाद्यसंस्कृतीचा झेंडा फडकावण्याची तयारी केली आहे.

राज्य सरकारकडून ‘एक्सपोर्ट ओरिएंटेड’ फूड इंडस्ट्रीला प्रोत्साहन देण्याचे संकेत देत, मुख्यमंत्री फडणवीस यांनी अशा उपक्रमांमुळे महाराष्ट्राची ओळख केवळ औद्योगिकच नव्हे, तर सांस्कृतिक दृष्ट्याही अधिक भक्कम होईल, असा विश्वास व्यक्त केला.या कार्यक्रमाला चंद्रकांत पाटील यांच्यासह विविध मान्यवरांची उपस्थिती होती.