बातम्या

भक्तीमय वातावरणात आजऱ्यात घरगुती गणरायांचे विसर्जन

By nisha patil - 3/9/2025 11:58:43 AM
Share This News:

भक्तीमय वातावरणात आजऱ्यात घरगुती गणरायांचे विसर्जन 

 आजरा:- (हसन तकीलदार):  आजऱ्यात घरगुती गणरायांचे विसर्जन उत्साही, शिस्तबद्ध आणि भक्तीमय वातावरणात पार पडले. पारंपरिक वाद्यांच्या गजरात, "गणपती बाप्पा मोरया"च्या घोषणांनी आणि भक्तीभावाच्या वातावरणात गणेश भक्तांनी आपल्या लाडक्या बाप्पाला निरोप दिला. घाटांवर, नदीवर आणि प्रवाहीत ओढ्यांमध्ये भाविकांनी गणेशमूर्तींचे विधिवत विसर्जन केले.

"गणपती गेले गावाला… चैन पडेना आम्हाला, पुढच्या वर्षी लवकर या" अशा जयघोषात वातावरण भारावून गेले होते. विसर्जनाच्या वेळी भाविकांच्या चेहऱ्यावर उत्साहाबरोबरच भावुकता आणि दुःखाचे भावही स्पष्ट दिसत होते.

ग्रामदैवत श्री रवळनाथाच्या मानाच्या गणेशमूर्तीची पालखी प्रथम बाहेर काढण्यात आली. त्यानंतर इतर मानकऱ्यांच्या मूर्ती आणि विविध गल्ली, कॉलन्यांतील मूर्ती विधिवत पूजा करून माता-भगिनींसह विसर्जनासाठी निघाल्या, अशी माहिती गौरव देशपांडे यांनी दिली.

या वर्षी विसर्जनावेळी पर्यावरणपूरक उपक्रम राबवण्यात आला. निर्माल्यदानासाठी विशेष आवाहन करण्यात आले होते. गणेशभक्तांनीही उत्स्फूर्त प्रतिसाद देत निर्माल्यसंकलनात सहभाग नोंदवला व प्रदूषणाला आळा घालण्याचा आदर्श घालून दिला.

हिरण्यकेशी नदीचे विविध घाट, मोरजकर महाराज समाधीनजिकचा घाट तसेच नेसरी मार्गावरील चित्री नदी घाट या ठिकाणी विसर्जनासाठी मोठ्या संख्येने गणेशभक्तांनी गर्दी केली होती.

संपूर्ण विसर्जन सोहळा शांततेत आणि शिस्तबद्ध पद्धतीने पार पडावा यासाठी सहाय्यक पोलीस निरीक्षक नागेश यमगर यांच्या मार्गदर्शनाखाली पोलीस बंदोबस्त आणि सुरक्षा व्यवस्था चोख ठेवण्यात आली होती.