विशेष बातम्या

भारत चंद्रावरून नमुने आणणार; ‘चांद्रयान-४’ मोहिमेला केंद्राची मंजुरी

By nisha patil - 11/17/2025 12:58:09 PM
Share This News:

भारताच्या अंतराळ संशोधन क्षेत्रात आणखी एक ऐतिहासिक पाऊल उचलण्यात आले असून ‘चांद्रयान-४’ या महत्त्वाकांक्षी मोहिमेला केंद्र सरकारने मंजुरी दिली आहे. भारतीय अंतराळ संशोधन संस्था (इस्रो) २०२८ पर्यंत ही मोहीम प्रक्षेपित करण्याची तयारी करत आहे.

या मोहिमेचे विशेष वैशिष्ट्य म्हणजे चंद्राच्या पृष्ठभागावरून काही नमुने गोळा करून ते सुरक्षितपणे पृथ्वीवर आणण्याची योजना असून, ही तांत्रिकदृष्ट्या अत्यंत क्लिष्ट व महत्त्वपूर्ण मोहीम मानली जात आहे. यापूर्वीच्या स्वदेशी तंत्रज्ञानाधारित मोहिमांमुळे आंतरराष्ट्रीय पातळीवर प्रभाव पाडल्यानंतर, इस्रो यंदा वर्षभरात सात प्रक्षेपण मोहिमांचे नियोजन करत आहे.

इस्रोचे अध्यक्ष व्ही. नारायणन यांनी दिलेल्या माहितीनुसार, भारताचे तंत्रज्ञान आणि औद्योगिक क्षमता द्रुतगतीने वाढत असून आगामी काळात एक व्यावसायिक संवाद उपग्रहासह पीएसएलव्ही आणि जीएसएलव्ही प्रक्षेपणांची मालिका राबविली जाणार आहे. याचबरोबर, २०३५ पर्यंत भारताचे स्वतःचे अंतराळ स्थानक उभारण्याची इस्रोची महत्त्वाकांक्षी योजना आकार घेत आहे.

या प्रकल्पातील पहिले मॉड्युल २०२८ मध्ये पृथ्वी कक्षेत स्थापित करण्याचे नियोजन असून, अमेरिका, चीन आणि रशिया यांच्यानंतर भारतही स्वतंत्र स्पेस स्टेशन उभारणाऱ्या राष्ट्रांच्या यादीत स्थान मिळवण्याच्या दिशेने पुढे सरकत आहे.