बातम्या

केडीसीसी बँकेच्या कर्मचाऱ्यांचा प्रामाणिकपणाचा आदर्श – सापडलेला पाच तोळ्यांचा दागिना परत

By nisha patil - 10/9/2025 5:26:25 PM
Share This News:

केडीसीसी बँकेच्या कर्मचाऱ्यांचा प्रामाणिकपणाचा आदर्श – सापडलेला पाच तोळ्यांचा दागिना परत

कोल्हापूर, दि. 10 : कोल्हापूर जिल्हा मध्यवर्ती सहकारी बँकेच्या (केडीसीसी) प्रधान कार्यालयातील कर्मचारी श्री. सुरेंद्र किरण पाटील यांनी सापडलेला पाच तोळ्यांचा सोन्याचा दागिना प्रामाणिकपणे मालकाकडे परत केल्याने त्यांच्या प्रामाणिकपणाचे सर्वत्र कौतुक होत आहे.

दागिना परत केल्याबद्दल बँकेचे अध्यक्ष व मंत्री हसन मुश्रीफ यांनी पुष्पगुच्छ देऊन त्यांचा सत्कार केला. यावेळी त्यांनी सांगितले, “प्रामाणिकपणा हाच माणसाचा खरा मौल्यवान दागिना आहे.”

घटनेचा तपशील

• सुरेंद्र पाटील हे सांगाव (ता. कागल) येथील असून बँकेच्या प्रधान कार्यालयातील शेती कर्ज विभागात क्लार्क पदावर कार्यरत आहेत.

• बँकेच्या नव्या इमारतीमागील पार्किंगमध्ये मोटरसायकल काढताना त्यांना पाच तोळ्यांचे सोन्याचे ब्रेसलेट सापडले.

• त्यांनी बँक कर्मचारी विकास पाटील (रा. कसबा बावडा) यांना संपर्क केला. सुरुवातीला त्यांना दागिना हरवल्याची जाणीव नव्हती, परंतु नंतर लक्षात येताच सुरेंद्र पाटील यांनी तो परत दिला.

कौतुकाची लाट

या प्रामाणिक कृतीबद्दल बँकेचे अधिकारी व कर्मचारी यांनी त्यांचे अभिनंदन केले. या प्रसंगी बँकेचे संचालक प्रताप उर्फ भैया माने आणि मुख्य कार्यकारी अधिकारी जी. एम. शिंदे उपस्थित होते.

 सुरेंद्र पाटील हे दिवंगत आमदार कै. शामराव भिवाजी पाटील (बापूजी) यांचे नातू असून त्यांच्या या आदर्श कृतीची चर्चा सर्वत्र होत आहे.