बातम्या

कौस्तुभ गावडे यांच्या विजयासाठी जीवाचे रान करू – श्रीराम साळुंखे

By nisha patil - 2/11/2025 2:37:02 PM
Share This News:

कौस्तुभ गावडे यांच्या विजयासाठी जीवाचे रान करू – श्रीराम साळुंखे

पुणे विभाग शिक्षक मतदार नोंदणी सहविचार सभेत शिक्षकांचा निर्धार

कोल्हापूर, दि. 2 नोव्हेंबर : महाराष्ट्राच्या शिक्षण क्षेत्रात आमूलाग्र बदल घडविण्यात शिक्षणमहर्षी डॉ. बापूजी साळुंखे यांचे योगदान अनमोल आहे. त्यांच्या विचारांचा वारसा लाभलेल्या  कौस्तुभ गावडे यांना विधान परिषदेत शिक्षक आमदार म्हणून विजयी करण्यासाठी आम्ही जीवाचे रान करू, असा निर्धार पुणे विभाग प्रचारप्रमुख श्रीराम साळुंखे यांनी व्यक्त केला.

ते पुणे विभाग शिक्षक मतदार नोंदणीसाठी शिक्षणमहर्षी डॉ. बापूजी साळुंखे स्मृतिभवन येथे आयोजित सहविचार सभेत बोलत होते. या सभेच्या अध्यक्षस्थानी श्री स्वामी विवेकानंद शिक्षण संस्थेचे कार्याध्यक्ष प्राचार्य अभयकुमार साळुंखे हे होते.

प्राचार्य अभयकुमार साळुंखे यांनी आपल्या अध्यक्षीय भाषणात सांगितले की, “शिक्षकांच्या प्रश्नांची जाण असणारा शिक्षक आमदार विधान परिषदेत असणे गरजेचे आहे. शिक्षणमहर्षींच्या विचारांतून प्रेरणा घेऊन कौस्तुभ गावडे यांनी आपली वाटचाल सुरू ठेवली आहे. त्यामुळे ६ नोव्हेंबरपर्यंत जास्तीत जास्त शिक्षक मतदार नोंदणी करून त्यांच्या विजयावर शिक्कामोर्तब करावे,” असे आवाहन त्यांनी केले.

कोल्हापूर जिल्ह्यातील मतदार नोंदणीचा आढावा घेताना जिल्हाप्रमुख भूपाल कुंभार यांनी मार्गदर्शन केले.

अधिकृत उमेदवार . कौस्तुभ गावडे यांनी जुनी पेन्शन योजना, संचमान्यता, टप्पा अनुदान, पवित्र प्रणाली, शिक्षक पात्रता परीक्षा (TET) सक्ती, वेतनेत्तर अनुदान यांसारख्या विषयांवर शिक्षकांना न्याय मिळवून देण्यासाठी आपण कटिबद्ध असल्याचे आश्वासन दिले.

या सभेस कोल्हापूर जिल्ह्यातील श्री स्वामी विवेकानंद शिक्षण संस्थेचे आजी-माजी पदाधिकारी, प्राचार्य, मुख्याध्यापक, शिक्षक मतदार नोंदणी जिल्हाप्रमुख, तालुकाप्रमुख, बुथप्रमुख आणि मोठ्या संख्येने शिक्षक उपस्थित होते.