बातम्या

माधुरी हत्तीच्या पुनर्प्रत्यावर्तनासाठी उद्धव ठाकरे यांचा पुढाकार

By nisha patil - 3/8/2025 3:15:23 PM
Share This News:

माधुरी हत्तीच्या पुनर्प्रत्यावर्तनासाठी उद्धव ठाकरे यांचा पुढाकार

राज्य, केंद्र आणि अंबानी यांच्याकडे पत्रव्यवहार

मुंबई – कोल्हापूरच्या अस्मितेचा भाग असलेल्या *‘माधुरी हत्ती’*ला पुन्हा कोल्हापुरात परत आणण्यासाठी शिवसेना पक्षप्रमुख उद्धव ठाकरे यांनी स्वतः पुढाकार घेतला आहे. त्यांनी यासंदर्भात महाराष्ट्र राज्य शासन, केंद्र शासन तसेच उद्योगपती मुकेश अंबानी यांच्याशी थेट पत्रव्यवहार करून माधुरी हत्ती परत मिळवण्यासाठी सर्वतोपरी प्रयत्न सुरू केले आहेत.

याच अनुषंगाने नुकतीच मुंबईतील मातोश्री निवासस्थानी एक महत्त्वपूर्ण बैठक झाली. या बैठकीत रविकिरण इंगवले, संजय चौगुले, उद्धव ठाकरे यांच्यासह शिवसेनेचे इतर पदाधिकारी उपस्थित होते. यावेळी माधुरी हत्ती परत मिळवण्याची मागणी असलेले निवेदन उद्धव ठाकरे यांना सादर करण्यात आले. ठाकरे यांनी या मागणीचा गांभीर्याने विचार करत संबंधित यंत्रणांकडे त्वरित पाठपुरावा करण्याचे आश्वासन दिले.

उद्धव ठाकरे यांनी सांगितले की, "माधुरी हत्ती हा केवळ एक प्राणी नसून कोल्हापूरच्या लोकांचा भावनिक व सांस्कृतिक ठेवा आहे. तिचे पुनर्प्रत्यावर्तन हे कोल्हापूरच्या अस्मितेसाठी अत्यंत आवश्यक आहे."

या पुढाकारामुळे कोल्हापुरातील जनतेत उत्साहाचे वातावरण असून, माधुरी हत्ती परत येण्यासाठी आशेचे किरण पुन्हा निर्माण झाले आहेत. उद्धव ठाकरे यांच्या या संवेदनशील आणि प्रभावी हस्तक्षेपाचे कोल्हापूर जिल्ह्यातून सर्वत्र स्वागत होत आहे.