बातम्या

पुढील काही वर्षांत महाराष्ट्र जगातील १३ वी अर्थव्यवस्था होईल –देवेंद्र फडणवीस 

By Administrator - 2/27/2026 11:15:32 AM
Share This News:

पुढील काही वर्षांत महाराष्ट्र जगातील १३ वी अर्थव्यवस्था होईल –देवेंद्र फडणवीस 

ट्रिलियन डॉलर अर्थव्यवस्था, दरवर्षी १० लाख रोजगार आणि मोठ्या गुंतवणुकीचे लक्ष्य

मुंबई :-  राज्यपालांच्या अभिभाषणावर उत्तर देताना मुख्यमंत्री देवेंद्र फडणवीस  यांनी महाराष्ट्राला ट्रिलियन डॉलर अर्थव्यवस्था बनवण्याचा निर्धार व्यक्त केला. दरवर्षी १० लाख रोजगारनिर्मिती, १३ ते १४ अब्ज डॉलर्स गुंतवणूक आणि वित्तीय तूट अडीच टक्क्यांच्या खाली आणण्याचे उद्दिष्ट त्यांनी जाहीर केले.

सध्या राज्याची अर्थव्यवस्था सुमारे ५१ लाख कोटी रुपयांची असून देशाच्या जीडीपीमध्ये राज्याचा वाटा १३.८ टक्के आहे. पुढील चार-पाच वर्षांत महाराष्ट्र ट्रिलियन डॉलर अर्थव्यवस्था बनून जगातील १३ वी अर्थव्यवस्था ठरेल, असा विश्वास त्यांनी व्यक्त केला.

‘विकसित महाराष्ट्र’ या संकल्पनेअंतर्गत २०२९, २०३४ आणि २०४७ या टप्प्यांनुसार विकासाचा रोडमॅप तयार करण्यात आला असून लाखो नागरिकांच्या सूचनांचा त्यात समावेश आहे.

World Economic Forum च्या दावोस परिषदेत झालेल्या करारांपैकी मोठ्या प्रमाणावर करार अंमलबजावणीत आहेत. देशातील ३९ टक्के थेट परकीय गुंतवणूक महाराष्ट्रात येत असल्याचा दावा करण्यात आला. Microsoft आणि Google यांसारख्या कंपन्यांची गुंतवणूक राज्यात वाढत असल्याचे त्यांनी सांगितले.

राज्यातील बेरोजगारी दर घटला असून आतापर्यंत १.२० लाखांहून अधिक सरकारी नोकऱ्या देण्यात आल्या आहेत. दरवर्षी १० लाख रोजगारनिर्मितीचे लक्ष्य निश्चित करण्यात आले आहे.

शेतकऱ्यांना डीबीटीद्वारे १५,४७२ कोटींची मदत देण्यात आली असून कृषी पंप योजना आणि डिजिटल जमीन नोंदणीवर भर देण्यात येत आहे.

भाषणाच्या शेवटी मुख्यमंत्री फडणवीस यांनी सर्वांना सोबत घेऊन विकसित महाराष्ट्र घडवण्याचा निर्धार व्यक्त केला.