बातम्या

माझे गाव, डेंग्यूमुक्त गाव!” — प्राथमिक आरोग्य केंद्र, वाटंगीचा अभिनव उपक्रम*

By nisha patil - 5/16/2026 12:54:29 PM
Share This News:

*“माझे गाव, डेंग्यूमुक्त गाव!” — प्राथमिक आरोग्य केंद्र, वाटंगीचा अभिनव उपक्रम*

आजरा (हसन तकीलदार)*: -महाराष्ट्र शासनाच्या “माझे गाव आरोग्य संपन्न गाव” अभियान अंतर्गत प्राथमिक आरोग्य केंद्र, वाटंगी ता. आजरा यांच्या वतीने १६ मे राष्ट्रीय डेंग्यू दिन विविध जनजागृतीपर व प्रतिबंधात्मक उपक्रमांनी साजरा करण्यात आला. “एक पाऊल स्वच्छतेकडे, एक पाऊल आरोग्याकडे” हा संदेश देत गावागावांत विशेष डेंग्यू प्रतिबंध मोहीम राबविण्यात आली.

या मोहिमेत कंटेनर सर्वे, घरभेटी, स्वच्छता मोहीम, डास उत्पत्ती स्थळांची तपासणी तसेच नागरिकांमध्ये व्यापक जनजागृती करण्यात आली. आरोग्य विभागाच्या पथकांनी पाण्याच्या टाक्या, कुलर, ड्रम, फुलदाण्या, जुने टायर तसेच साचलेल्या पाण्याच्या ठिकाणांची तपासणी करून नागरिकांना डासांची उत्पत्ती रोखण्यासाठी आवश्यक उपाययोजनांची माहिती दिली.

डेंग्यू हा डेंग्यू विषाणूमुळे होणारा संसर्गजन्य आजार असून तो एडिसएजिप्ती डासाच्या चाव्यामुळे पसरतो. हा डास प्रामुख्याने स्वच्छ साचलेल्या पाण्यात वाढतो. वाढते शहरीकरण, सांडपाण्याची अयोग्य विल्हेवाट आणि परिसरात साचणारे पाणी ही डेंग्यू वाढण्याची प्रमुख कारणे असल्याचे आरोग्य विभागाने स्पष्ट केले.

यावेळी “डास हटवा – डेंग्यू रोखा”, “स्वच्छ गाव – निरोगी गाव” अशा घोषणांनी परिसर दणाणून गेला. नागरिकांना डेंग्यूची लक्षणे व प्रतिबंधात्मक उपाययोजनांबाबत सविस्तर मार्गदर्शन करण्यात आले. अचानक ताप येणे, तीव्र डोकेदुखी, सांधे व स्नायू दुखणे, उलट्या होणे, अंगावर पुरळ येणे तसेच गंभीर अवस्थेत रक्तस्त्राव होणे ही डेंग्यूची प्रमुख लक्षणे असल्याची माहिती देण्यात आली.

 डास नियंत्रणासाठी जैविक उपाय म्हणून गप्पी मासे सोडण्याचे प्रात्यक्षिक सादर करण्यात आले. गप्पी मासे डासांच्या अळ्या खात असल्याने डासांची पैदास कमी होण्यास मोठी मदत होते, याबाबत ग्रामस्थांना प्रत्यक्ष माहिती देण्यात आली. तसेच आठवड्यातून एक दिवस “ड्राय डे” पाळणे, परिसर स्वच्छ ठेवणे, पूर्ण बाह्यांचे कपडे वापरणे, मच्छरदाणीचा वापर करणे व ताप आल्यास तात्काळ आरोग्य केंद्रात तपासणी करणे आवश्यक असल्याचे आवाहन करण्यात आले.

सदर उपक्रम तालुका आरोग्य अधिकारी डॉ. आर. जी. गुरव यांच्या मार्गदर्शनाखाली वैद्यकीय अधिकारी डॉ. एम. ए. शेख, आरोग्य निरीक्षक अतुल पाथरवट, आरोग्य सहाय्यक जे. एच. साबखान, आरोग्य सहाय्यका गीतांजली सुतार तसेच आरोग्य सेवक युनुस सय्यद, शिवम तरोळे, दर्शन भालेराव, दिपक हरणे, लक्ष्मण घोरपडे, प्रमोद कांबळे व रोहित शेंडे यांनी यशस्वीपणे राबविला.

या मोहिमेला आरोग्य सेविका, आशा स्वयंसेविका, युवक मंडळे व ग्रामस्थांचा उत्स्फूर्त प्रतिसाद लाभला. सामूहिक सहभागातून “माझे गाव, डेंग्यूमुक्त गाव” हा संकल्प अधिक दृढ uकरण्यात आला.