विशेष बातम्या

नेल्सन मंडेला नोबेल पीस अवॉर्ड 2025 : भारतीय आयुर्वेदाच्या तेजाला जागतिक मंचावर निपाणीचा मानाचा मुजरा

By nisha patil - 9/12/2025 4:23:36 PM
Share This News:

नेल्सन मंडेला नोबेल पीस अवॉर्ड 2025 : भारतीय आयुर्वेदाच्या तेजाला जागतिक मंचावर निपाणीचा मानाचा मुजरा

कलंगुट, गोवा : गोवा येथील हॉटेल नीलम द ग्रँड मध्ये पार पडलेला नेल्सन मंडेला नोबेल पीस अवॉर्ड 2025 चा सोहळा केवळ पुरस्कार वितरणाचा कार्यक्रम न ठरता, मानवतावाद, सामाजिक जबाबदारी आणि प्राचीन भारतीय परंपरेच्या जागतिक प्रभावाचीच एक भव्य घोषणा ठरला.

सोहळ्याचे प्रमुख मानकरी —
 सुभाष फलदेसाई,
हर हायनेस अरशी जवेरी,
तसेच मल्टिप्रेन्योर रॉबिन अल्मेडा
या प्रतिष्ठित व्यक्तींच्या उपस्थितीने कार्यक्रमाची उंची आणखी वाढली. जागतिक शांततेच्या मूल्यांना अधिक बळ देणाऱ्या व्यक्ती व संस्थांचा गौरव करण्याच्या ध्येयाने हा सोहळा सजला होता.

याच मंचावर सर्वांचे लक्ष वेधून घेणारा सन्मान प्राप्त झाला तो M/S Suvarnved Pharmaceutical या आयुर्वेदभिमुख संस्थेला. या संस्थेचे संस्थापक – निपाणी गावचे रहिवासी डॉ. शिवानंद कुंभार व सौ. स्नेहा शिवानंद कुंभार – यांनी हा जागतिक प्रतिष्ठेचा पुरस्कार स्वीकारताच सभागृहात टाळ्यांचा कडकडाट झाला.

आयुर्वेदातील सातत्यपूर्ण संशोधन, ग्रामीण महिलांसाठी रोजगार निर्मिती, आरोग्यसेवेतील नवे मानदंड आणि भारतीय आयुर्वेदाचा जागतिक विस्तार यासाठी त्यांचे योगदान उल्लेखनीय मानण्यात आले.

सन्मान स्वीकारताना डॉ. शिवानंद कुंभार यांचे शब्द संपूर्ण सभागृहाला खोलवर स्पर्शून गेले :
“हा पुरस्कार आमच्या आयुर्वेद परंपरेचा आहे. जगभरातील प्रत्येक व्यक्तीपर्यंत शास्त्रीय, सुलभ व परवडणाऱ्या स्वरूपात आयुर्वेद पोहोचवण्याची आमची धडपड अखंड सुरू राहील.”

मानवतेचे मूल्य, सामाजिक समता आणि आरोग्यसेवेतील भारतीय ज्ञानपरंपरेचे स्थान यावर मान्यवरांनी केलेल्या भाषणांनी हा समारोह केवळ शोभिवंत न ठरता, विचारांना चालना देणारा क्षण ठरला.

देश-विदेशातील प्रतिष्ठित पाहुण्यांच्या उपस्थितीत, संस्कृतीचा, विज्ञानाचा आणि सेवाभावाचा मोहोर उमटवत सोहळ्याचा समारोप राष्ट्रगीताने झाला.