कोल्हापूर : राजर्षी छत्रपती शाहू महाराज शासकीय वैद्यकीय महाविद्यालय (सीपीआर) येथे नव्याने रुजू झालेले अधिष्ठाता डॉ. सदानंद भिसे यांनी पदभार स्वीकारताच शिस्त आणि कार्यक्षमतेवर भर देत कडक कारवाईला सुरुवात केली आहे. वेळेत हजेरी न लावणाऱ्या तब्बल ३० डॉक्टरांना नोटिसा बजावण्यात आल्या असून, यामध्ये अनेक विभागप्रमुखांचाही समावेश असल्याचे समजते.

डॉ. भिसे यांनी बुधवारी मध्यरात्री साडेबाराच्या सुमारास अचानक रुग्णालयाची पाहणी केली. या वेळी त्यांनी परिसरातील सुरक्षा व्यवस्थेची तपासणी केली असता एक सुरक्षा रक्षक झोपलेला आढळून आला. त्यानंतर विविध विभागांना दिलेल्या भेटीतही त्यांनी अनेक डॉक्टर गैरहजर असल्याचे निदर्शनास आणले. पुढील दोन दिवस सकाळच्या राऊंडमध्येही त्यांनी उपस्थिती तपासली असता अनेक डॉक्टर वेळेत न आल्याचे स्पष्ट झाले.

रुग्णांकडून “डॉक्टर वेळेत येत नाहीत” अशा तक्रारी येत असल्याने ही कारवाई करण्यात आली आहे. सीपीआरमध्ये डॉक्टरांची सेवेची वेळ सकाळी ८:३० ते दुपारी २ अशी निश्चित असून, “या वेळेत सर्व डॉक्टर्स हजर असायलाच हवेत; कोणतीही हलगर्जी सहन केली जाणार नाही,” असा इशारा अधिष्ठाता डॉ. भिसे यांनी दिला आहे.

“सीपीआरच्या कामकाजाची माहिती व्हावी म्हणून राऊंड सुरू आहेत. ज्या त्रुटी आढळल्या, त्याबाबत विचारणा केली जात आहे.”
डॉ. सदानंद भिसे, अधिष्ठाता, सीपीआर, कोल्हापूर

या कारवाईनंतर रुग्णालयातील कर्मचाऱ्यांमध्ये शिस्त आणि जबाबदारीबाबत सजगतेचे वातावरण निर्माण झाले असून, रुग्ण सेवेला प्राधान्य देण्याचा संदेश स्पष्टपणे गेला आहे.