मनोरंजन

प्रसिद्ध अभिनेत्री नुपुर अलंकार — टीव्हीच्या जगातून हिमालयातील गुहांपर्यंतचा प्रवास!

By nisha patil - 8/11/2025 12:27:56 PM
Share This News:

एकेकाळी टीव्हीवरील प्रसिद्ध चेहरा असलेली नुपुर अलंकार… आज मात्र हिमालयातील गुहांमध्ये राहते, भिक्षा मागते आणि फक्त अध्यात्मात जगते. ऐकायला अविश्वसनीय वाटेल, पण ही खरी कहाणी आहे त्या अभिनेत्रीची, जिने एके काळी “शक्तिमान”, “घर की लक्ष्मी बेटियां”, “रेत”, “दिया और बाती हम” अशा १५० पेक्षा जास्त मालिकांमध्ये काम करून लाखो प्रेक्षकांची मने जिंकली होती.

नुपुर अलंकार यांच्या आयुष्यात एक काळ असा आला, ज्यानंतर सर्व काही बदललं. आर्थिक संकट, वैयक्तिक दु:खं आणि आयुष्याच्या अर्थाचा शोध — या तिन्ही गोष्टींनी तिला वेगळी दिशा दाखवली. PMC बँक घोटाळ्यामुळे तिचे बरेच पैसे बँकेत अडकले. त्याच सुमारास तिच्या आईचा आणि बहिणीचा मृत्यू झाला. जगण्याचं ओझं वाढत गेलं आणि नुपुरने ठरवलं — आता या सांसारिक जीवनातून मुक्त व्हायचं.

२०२२ मध्ये तिने सर्व काही मागे सोडून दिलं — करिअर, प्रसिद्धी, आणि अगदी पतीही. ती म्हणते, “मी या जगाच्या गोंधळातून सुटू इच्छित होते. मला फक्त शांतता हवी होती.” नुपुरने सगळं सोडून सन्न्यास घेतला आणि स्वतःला ‘पीतांबरा मां’ या नावाने ओळखू लागली. आज ती हिमालय, ऋषिकेश, हरिद्वार या ठिकाणी राहते, गुहांमध्ये झोपते, आणि साधं अन्न खाऊन समाधानी असते.

ती म्हणते की आता तिचा मासिक खर्च फक्त ₹१०,००० ते ₹१२,००० आहे. जेव्हा काही मिळत नाही, तेव्हा ती लोकांकडून भिक्षा मागते. तिच्या म्हणण्यानुसार, “भिक्षा मागताना अहंकार नष्ट होतो. माणूस आपल्या मूळ स्वरूपाशी जवळ जातो.” इतक्या मोठ्या प्रसिद्धीच्या शिखरावरून खाली येऊन इतकं साधं जीवन जगणं हे निश्चितच कठीण आहे, पण नुपुरसाठी हेच खरे स्वातंत्र्य आहे.

तिचं म्हणणं आहे की ती आता खऱ्या आनंदात आहे. न पैसा, न शोहरत, न लोभ — फक्त शांतता आणि अध्यात्म. तिचा चेहरा जरी आता टीव्हीवर दिसत नसेल, तरी तिची कहाणी आज हजारोंच्या मनात प्रश्न निर्माण करते — आपण सगळे ज्या यशाच्या मागे धावत आहोत, त्याचा शेवट खरंच समाधानात होतो का?

नुपुर अलंकारचं आयुष्य दाखवतं की कधी कधी सर्व काही मिळवण्यासाठी आपल्याला सर्व काही गमवावं लागतं. आणि खरी संपत्ती म्हणजे अंतर्मनाची शांती.