बातम्या

NET-SET परीक्षेच्या तयारीसाठी विवेकानंद कॉलेजमध्ये ऑनलाइन व्याख्यान

By nisha patil - 1/12/2025 5:19:25 PM
Share This News:

 NET-SET परीक्षेच्या तयारीसाठी विवेकानंद कॉलेजमध्ये ऑनलाइन व्याख्यान

कोल्हापूर दि. 1: विवेकानंद कॉलेज, कोल्हापूर येथील प्राणिशास्त्र विभागाच्या वतीने “NET-SET परीक्षेच्या तयारीच्या रणनीती” या विषयावर ऑनलाइन अतिथी व्याख्यानाचे आयोजन करण्यात आले. स्पर्धा परीक्षेत यश मिळवू इच्छिणाऱ्या विद्यार्थ्यांना योग्य दिशादर्शन देण्याच्या उद्देशाने हा उपक्रम आयोजित करण्यात आला होता. NET-SET परीक्षेतील दीर्घ अनुभव आणि मार्गदर्शन कार्यामुळे ओळखले जाणारे डॉ. शिलानंद हिवराळे यांना या कार्यक्रमासाठी प्रमुख अतिथी म्हणून आमंत्रित करण्यात आले.
            
कार्यक्रमाचे सूत्रसंचालन डॉ. स्नेहा देसाई यांनी केले, तर प्रा. गणेश फडके यांनी प्रमुख अतिथींचा परिचय करून दिला. व्याख्यानात डॉ. हिवराळे यांनी NET-SET परीक्षेतील अभ्यासाची योग्य पद्धत, वेळेचे नियोजन, अभ्यासक्रमाचे वैज्ञानिक विभाजन, मान्यताप्राप्त संदर्भग्रंथांचा अभ्यास, प्रश्नपत्रिकेत दिसून येणाऱ्या नव्या प्रवृत्ती तसेच सराव प्रश्नपत्रिकांचे (Mock Tests) महत्त्व या सर्व मुद्द्यांवर सखोल मार्गदर्शन केले. त्यांनी विद्यार्थ्यांना सातत्यपूर्ण अभ्यास, नियमित पुनरावलोकन आणि अभ्यासाच्या गुणवत्तेचे आत्मपरीक्षण हा परीक्षेत यश मिळवण्याचा महत्त्वपूर्ण मंत्र असल्याचे विशेषत्वाने सांगितले.  या सत्रादरम्यान विद्यार्थ्यांनी उत्साहपूर्ण सहभाग नोंदवत विविध शंका विचारल्या. डॉ. हिवराळे यांनी प्रत्येक प्रश्नाचे परिणामकारक उत्तर देत विद्यार्थ्यांना अभ्यासाची योग्य दिशा दिली. व्याख्यानामुळे विद्यार्थ्यांच्या NET-SET परीक्षेच्या तयारीबाबतची स्पष्टता मोठ्या प्रमाणावर वाढल्याचे दिसून आले.
           
कार्यक्रमाचे आभारप्रदर्शन प्रा. नाजनीन पटेल यांनी केले. संपूर्ण उपक्रमाला प्राणिशास्त्र विभागाचे प्रमुख डॉ. जी. के. सोनटक्के तसेच महाविद्यालयाचे प्रभारी प्राचार्य डॉ. एस. पी. थोरात यांचे मार्गदर्शन लाभले. या ऑनलाइन व्याख्यानाला एकूण ४० विद्यार्थी सक्रियपणे उपस्थित राहिले आणि विद्यार्थ्यांच्या उत्स्फूर्त प्रतिसादामुळे कार्यक्रम अत्यंत यशस्वीरीत्या पार पडला.