विशेष बातम्या

रब्बी हंगाम 2025 साठी पिकस्पर्धेचे आयोजन

By nisha patil - 5/12/2025 4:19:30 PM
Share This News:

रब्बी हंगाम 2025 साठी पिकस्पर्धेचे आयोजन

कोल्हापूर, दि. 5 : प्रयोगशील शेतकऱ्यांना प्रोत्साहन देवून कृषी उत्पादनामध्ये भर घालण्यासाठी शेतकऱ्यांचे मनोबल वाढवण्याच्या उद्देशाने कृषी विभागामार्फत राज्यांतर्गत पीक स्पर्धा योजना राबविण्यात येत आहे. रब्बी हंगाम सन 2025 मध्ये सर्वसाधारण व आदिवासी गटासाठी ज्वारी, गहू, हरभरा, करडई व जवस या 5 पिकांसाठी पीक स्पर्धेचे आयोजन करण्यात आले आहे.

पात्रता निकष- स्पर्धेत भाग घेण्यासाठी शेतकऱ्याकडे स्वतःच्या नावे जमीन असणे व ती जमीन तो स्वतः कसत असणे आवश्यक आहे. स्पर्धेत भाग घेणाऱ्या शेतकऱ्याला एकाच वेळी एकापेक्षा जास्त पिकासाठी स्पर्धेत भाग घेता येईल. पिक स्पर्धेमध्ये सहभागी लाभार्थ्याच्या स्वतःच्या शेतावर त्या पिकाखाली किमान 40 आर क्षेत्रावर लागवड असणे आवश्यक आहे.

अर्ज करण्यासाठी आवश्यक कागदपत्रे- विहित नमुन्यातील अर्ज (प्रपत्र-अ), ठरवून दिलेले प्रवेश शुल्क भरल्याचे चलन, 7/12, 8-अ चा उतारा, जात प्रमाणपत्र (आदिवासी असल्यास), पिकस्पर्धेसाठी शेतकऱ्याने संबंधित 7/12 वरील घोषित केलेल्या क्षेत्राचा चिन्हांकित केलेला नकाशा जोडणे आवश्यक, बँक खाते चेक/पासबुकच्या पहिल्या पानाची छायांकित प्रत इ.

रब्बी हंगामामध्ये पीक स्पर्धेचे अर्ज दाखल करण्याची तारीख - ज्वारी, गहू, हरभरा, करडई व जवस - 31 डिसेंबर असून तालुकास्तर, जिल्हास्तर व राज्यस्तरावरील पिकस्पर्धा निकाल प्रथम, द्वितीय व तृतीय क्रमांकाचे पीक स्पर्धा विजेते निवडण्यात येतील.

सर्वसाधारण व आदिवासी गटासाठी बक्षीस -तालुका स्तरावर- पहिले- 5 हजार, दुसरे- 3 हजार व तिसरे 2 हजार रुपये, जिल्हा स्तरावर- पहिले- 10 हजार, दुसरे- 7 हजार व तिसरे 5 हजार रुपये, राज्य स्तरावर- पहिले- 50 हजार, दुसरे- 40 हजार व तिसरे 30 हजार रुपये याप्रमाणे आहे.

स्पर्धेसाठी प्रवेश शुल्क - पीकनिहाय सर्वसाधारण गटासाठी रक्कम रु. 300/- राहील व आदिवासी गटासाठी रक्कम रु. 150/- राहील.

वर नमूद पिकांच्या क्षेत्रात आणि उत्पादनात वाढ व्हावी याकरीता जास्तीत जास्त शेतकऱ्यांनी पिक स्पर्धेत सहभागी व्हावे, असे आवाहन कृषी विभागामार्फत करण्यात येत आहे.  पिकस्पर्धेबाबत अधिक माहितीसाठी  संबंधित तालुका कृषी अधिकारी कार्यालयाशी संपर्क साधावा. तसेच महाराष्ट्र शासन कृषी विभागाचे http://krishi.maharashtra.gov.in संकेतस्थळ पहावे. अधिक माहितीसाठी खालील QR कोड स्कॅन करावा, असे आवाहन जिल्हा जिल्हा अधिक्षक कृषि अधिकारी  जालिंदर पांगरे यांनी केले आहे.