शैक्षणिक

 विवेकानंद कॉलेजमध्ये राजर्षी छत्रपती शाहू महाराज जयंती साजरी

By nisha patil - 6/26/2025 10:10:40 PM
Share This News:

 विवेकानंद कॉलेजमध्ये राजर्षी छत्रपती शाहू महाराज जयंती साजरी

कोल्हापूर दि.26: विवेकानंद कॉलेजमध्ये राजर्षी छत्रपती शाहू महाराज यांच्या 151 व्या जयंती निमित विवेकानंद कॉलेजचे प्राचार्य डॉ. आर.आर.कुंभार यांचे हस्ते राजर्षी छत्रपती शाहू महाराजांच्या प्रतिमेचे पूजन करण्यात आले. 

याप्रसंगी बोलताना  प्राचार्य डॉ. आर.आर.कुंभार म्हणाले, बहुजन समाजात शिक्षणाचे नव नवे प्रयोग राजर्षि शाहू महाराजांनी केले. प्राथमिक शिक्षण सक्तीचे आणि मोफत करण्याचा करवीर संस्थानामधला शाहूंचा आदेश भविष्यकाळात समाजात आमूलाग्र बदल घडविणारा ठरला. शाहू महाराज समाज क्रांतीचे प्रणेते होते. समतेचे, न्यायाचे आणि लोककल्याणाचे राज्य स्थापन करण्याचे महत्तम कार्य राजर्षि शाहूंनी केले.  निर्बलांचे रक्षण करण्याचे काम शाहूंनी केले. राजर्षि शाहूंचे विचार गुरुदेव कार्यकर्त्यांनी समाजात रुजवावेत.

याप्रसंगी  डॉ. अवधूत टिपुगडे यांनी  राजर्षी शाहू महाराज कार्य आणि कर्तृत्व्‍ या विषयावर विचार मांडले.  ते म्हणाले, राजर्षी शाहू महाराज यांचे कला, क्रीडा, शिक्षण, कृषी असे सर्वव्यापी कार्य होते.  ते सकलजनवादी रयतेचे राजे होते.  त्यांच्या कार्याची आणि विचारांची प्रस्तुतता आजच्या काळातही टिकून आहे. 
 

कार्यक्रमाचे प्रास्ताविक डॉ. दत्ता जाधव  यांनी केले. तर आभार डॉ. संतोष कोळी यांनी मानले. याप्रसंगी महाविद्यालयातील IQAC समन्वयक डॉ.श्रृती जोशी, स्टाफ सेक्रेटरी, प्रा.बी.एस.कोळी, प्रा एस टी शिंदे, प्रा. सौ शिल्पा भोसले, डॉ. ई.बी.आळवेकर, प्रा. एम. आर, नवले  प्रबंधक श्री.एस.के.धनवडे, प्राध्यापक, प्रशासकीय कर्मचारी आणि विद्यार्थी-विद्यार्थिनी मोठ्या संख्येने उपस्थित होते.