आरोग्य
कोल्हापूर जिल्ह्यात एचआयव्ही तपासणीत उल्लेखनीय कामगिरी — ६९ हजारांहून अधिक तपासण्या, एकाही नवजात बालकाला संसर्ग नाही
By nisha patil - 1/11/2025 11:49:52 AM
Share This News:
कोल्हापूर : जिल्ह्यात यावर्षी आतापर्यंत उद्दिष्टापेक्षा जास्त म्हणजेच तब्बल ६९,४७० एचआयव्ही तपासण्या करण्यात आल्या आहेत. त्यापैकी २६७ जण पॉझिटिव्ह आढळले असून त्याची टक्केवारी ०.४ इतकी आहे. या तपासण्यांमध्ये ३४,३५६ गरोदर महिलांची तपासणी करण्यात आली असून त्यापैकी केवळ १० महिला पॉझिटिव्ह आढळल्या आहेत.
विशेष म्हणजे, या महिलांच्या ३८ नवजात बालकांपैकी एकाही बालकाला एचआयव्हीचा संसर्ग झालेला नाही, असे जिल्हा प्रशासनाने सांगितले.
जिल्हाधिकारी अमोल येडगे यांनी सांगितले की, सेक्स वर्कर, स्थलांतरित कामगार, क्षयरोगी तसेच गरोदर महिला या जोखीम गटांतील सर्व व्यक्तींना प्राधान्याने १०० टक्के एचआयव्ही तपासणीसाठी समाविष्ट करावे. तसेच, आवश्यकतेनुसार जिल्हा नियोजन समितीमधून तपासणी किटकरिता निधी उपलब्ध करून देण्यात येईल.
ही माहिती जिल्हा एड्स प्रतिबंध समितीच्या बैठकीत शुक्रवारी देण्यात आली. या बैठकीस जिल्हा आरोग्य अधिकारी डॉ. अनिरुद्ध पिंपळे, डॉ. रेश्मा पाटील, जिल्हा कार्यक्रम अधिकारी दीपा शिपूरकर, जिल्हा क्षयरोग अधिकारी डॉ. हर्षला वेदक यांच्यासह विविध स्वयंसेवी संस्थांचे प्रतिनिधी उपस्थित होते.
जागतिक युवा दिनाच्या पार्श्वभूमीवर जिल्ह्यातील शाळा, महाविद्यालये आणि ग्रामपंचायतींमध्ये इंटेन्सिफाइड आयईसी कॅम्पेन अंतर्गत संवेदीकरणाचे कार्यक्रम सुरू आहेत. या उपक्रमाच्या कामगिरीचे जिल्हाधिकाऱ्यांनी विशेष कौतुक केले.
🔹 मुख्य मुद्दे:
• ६९,४७० एचआयव्ही तपासण्या पूर्ण
• २६७ पॉझिटिव्ह रुग्ण आढळले (०.४%)
• ३४,३५६ गरोदर महिलांची तपासणी
• १० महिला पॉझिटिव्ह, परंतु ३८ बालके पूर्णपणे सुरक्षित
• जोखीम गटांसाठी १००% तपासणीचे निर्देश
कोल्हापूर जिल्ह्यात एचआयव्ही तपासणीत उल्लेखनीय कामगिरी — ६९ हजारांहून अधिक तपासण्या, एकाही नवजात बालकाला संसर्ग नाही
|