शैक्षणिक

सातवीच्या विद्यार्थ्यांना साडेसात हजारांची शिष्यवृत्ती; पात्रतेत बदल करून चौथीच्या मुलांनाही संधी

By nisha patil - 10/28/2025 11:17:38 AM
Share This News:

कोल्हापूर :- राज्य शासनाने विद्यार्थ्यांच्या शैक्षणिक गुणवत्तेत वाढ करण्यासाठी शिष्यवृत्ती परीक्षेच्या पात्रतेत महत्त्वाचा बदल केला आहे. आता पूर्व उच्च प्राथमिक शिष्यवृत्ती परीक्षा आणि पूर्व माध्यमिक शिष्यवृत्ती परीक्षा या अनुक्रमे इयत्ता सातवी आणि इयत्ता चौथीमध्ये घेतल्या जाणार आहेत. या बदलाची अंमलबजावणी शैक्षणिक वर्ष २०२५-२६ पासून होणार आहे.

यामुळे पाचवीऐवजी चौथी आणि आठवीऐवजी सातवीचे विद्यार्थी शिष्यवृत्ती परीक्षेस बसू शकतील. शासनाच्या निर्णयामुळे विद्यार्थ्यांना लवकर वयात स्पर्धात्मक परीक्षेचा अनुभव मिळेल आणि त्यांच्या गुणवत्तेत भर पडेल, असा उद्देश आहे.

परीक्षा वेळापत्रक आणि रक्कम
    •    फेब्रुवारी २०२६ मध्ये पाचवी आणि आठवीसाठी शिष्यवृत्ती परीक्षा घेतली जाणार आहे.
    •    चौथी आणि सातवीसाठी परीक्षा एप्रिल किंवा मे २०२६ मध्ये होईल.
    •    २०२६-२७ पासून दरवर्षी नियमितपणे चौथी आणि सातवीसाठी या परीक्षा घेतल्या जातील.

शिष्यवृत्ती रक्कम:
    •    इयत्ता चौथी: ₹५,००० प्रति वर्ष
    •    इयत्ता सातवी: ₹७,५०० प्रति वर्ष

परीक्षेचे नाव आणि पात्रता:
    •    परीक्षांची नावे आता बदलून अनुक्रमे
    •    ‘प्राथमिक शिष्यवृत्ती परीक्षा’ (इयत्ता चौथी)
    •    ‘उच्च प्राथमिक शिष्यवृत्ती परीक्षा’ (इयत्ता सातवी) अशी करण्यात येणार आहेत.

पात्रता अटी:
    •    सर्व प्रवर्गातील विद्यार्थ्यांचे १ जून रोजी कमाल वय १० वर्षे असावे.
    •    दिव्यांग विद्यार्थ्यांसाठी कमाल वय १४ वर्षांपेक्षा अधिक नसावे.

शुल्क संरचना:
    •    बिगर मागासवर्गीय विद्यार्थ्यांसाठी प्रवेश शुल्क: ₹५०
    •    परीक्षा शुल्क: ₹१५०
    •    प्रत्येक शाळेसाठी वार्षिक नोंदणी शुल्क: ₹२०० (राज्य परीक्षा परिषदेकडे जमा करणे आवश्यक).

या बदलामुळे विद्यार्थ्यांना लवकर वयात शिष्यवृत्तीची प्रेरणा मिळेल आणि ग्रामीण तसेच शहरी भागातील गुणवंतांना समान संधी उपलब्ध होणार आहे.