खेळ

शाहरुख–जुही यांच्या कोलकाता नाइट रायडर्स संघाचा काही हिस्सा विक्रीच्या तयारीत

By nisha patil - 12/20/2025 12:36:52 PM
Share This News:

नवी दिल्ली:- बॉलीवूड अभिनेता शाहरुख खान आणि अभिनेत्री जुही चावला–जय मेहता यांच्या मालकीच्या आयपीएलमधील तीन वेळा विजेत्या कोलकाता नाइट रायडर्स (KKR) संघाचा काही हिस्सा विक्रीसाठी काढण्याची तयारी सुरू असल्याची माहिती समोर आली आहे. ही विक्री प्रक्रिया आयपीएल 2026 हंगाम सुरू होण्यापूर्वी पूर्ण होण्याची शक्यता आहे.

अल्प हिस्सा विक्रीचा विचार

मिळालेल्या माहितीनुसार, कोलकाता संघाचा अल्प हिस्सा (मायनॉरिटी स्टेक) विकला जाणार असून, त्यामुळे संघाच्या नियंत्रण किंवा मालकी हक्कावर कोणताही परिणाम होणार नाही. ‘मनीकंट्रोल’ या संकेतस्थळाने याबाबत वृत्त दिले आहे.

मालकी रचना काय आहे?

कोलकाता नाइट रायडर्स संघाचे संचालन ‘नाइट रायडर्स स्पोर्ट्स प्रायव्हेट लिमिटेड’ या कंपनीअंतर्गत केले जाते.
    •    रेड चिलीज एंटरटेन्मेंट (शाहरुख खान) – 55 टक्के हिस्सा
    •    मेहता ग्रुप (जुही चावला–जय मेहता) – 45 टक्के हिस्सा

हा संघ 2008 साली अंदाजे 298 कोटी रुपयांना खरेदी करण्यात आला होता.

इतर संघांचाही हिस्सा विक्रीत

याआधी आयपीएलमधील रॉयल चॅलेंजर्स बंगळुरू आणि राजस्थान रॉयल्स संघांच्या मालकीत बदल किंवा हिस्सा विक्रीबाबत चर्चा सुरू असल्याचे समोर आले होते. बंगळुरू संघाचे मालक डियाजियो यांनी मार्च 2026 पूर्वी विक्री प्रक्रिया पूर्ण करण्याचा मानस व्यक्त केला आहे.

नियंत्रण कायम राहणार

अहवालानुसार, कोलकाता नाइट रायडर्स संघाच्या सहमालक मेहता ग्रुप सध्या केवळ छोटा हिस्सा विकण्याचा विचार करत असून, संघाची धोरणात्मक व व्यवस्थापकीय सूत्रे सध्याच्या मालकांकडेच राहणार आहेत.