शैक्षणिक

शिवाजी विद्यापीठाचा एक्सलॉजिया कंपनीसमवेत सामंजस्य करार

By nisha patil - 4/18/2026 4:12:11 PM
Share This News:

शिवाजी विद्यापीठाचा एक्सलॉजिया कंपनीसमवेत सामंजस्य करार

कोल्हापूर, दि. १८ एप्रिल : शैक्षणिक संशोधनाचा प्रत्यक्ष समाज आणि उद्योग क्षेत्राशी सेतू निर्माण करण्याच्या दिशेने शिवाजी विद्यापीठाने एक महत्त्वपूर्ण पाऊल टाकले आहे. विद्यापीठ आणि पुण्यातील एक्सलॉजिया टेक एलएलपी यांच्यात झालेल्या सामंजस्य करारामुळे ‘आभासी वास्तविकता’ (AR) आधारित शिक्षण प्रणाली आणि ‘क्यू.आर.’ आधारित बँकिंग तंत्रज्ञानाला व्यावहारिक वापराची नवी दिशा मिळणार आहे.

विद्यापीठाच्या यशवंतराव चव्हाण स्कूल ऑफ रुरल डेव्हलपमेंटने विकसित केलेल्या SUK-AR शैक्षणिक प्रणालीतील डिजिटल अ‍ॅसेट्स तसेच QR आधारित बँकिंग प्रणालीच्या वापर व वितरणासाठी हा करार करण्यात आला. यामुळे विद्यापीठात विकसित होणारे संशोधन केवळ कागदावर न राहता उद्योग क्षेत्रात प्रत्यक्ष उतरवले जाईल, अशी अपेक्षा व्यक्त होत आहे. प्रभारी प्र-कुलगुरू डॉ. ज्योती जाधव यांनी यावेळी सांगितले की, विद्यापीठातील तंत्रज्ञानाची सिद्धता करून त्याचा समाजोपयोगी वापर सुनिश्चित करणे अत्यंत आवश्यक आहे. या प्रक्रियेमुळे विद्यार्थ्यांना प्रत्यक्ष उद्योगातील अनुभव मिळेल आणि त्यांच्या कौशल्यविकासाला चालना मिळेल.
एक्सलॉजिया कंपनीचे प्रतिनिधी शैलेश कोपार्डेकर यांनीही विद्यापीठीय संशोधन उद्योगापर्यंत पोहोचवण्याची गरज अधोरेखित केली. या कराराच्या माध्यमातून समाज आणि उद्योग क्षेत्राला ठोस लाभ मिळवून देण्यासाठी लवकरच प्रयत्न सुरू केले जातील, असे त्यांनी स्पष्ट केले.
या सामंजस्य करारावर कुलसचिव डॉ. विलास शिंदे आणि शैलेश कोपार्डेकर यांनी स्वाक्षऱ्या केल्या. कार्यक्रमात डॉ. नितीन माळी, डॉ. सुधीर देसाई यांच्यासह विविध प्राध्यापक, संशोधक आणि कंपनीचे अधिकारी उपस्थित होते.
एकूणच, या करारामुळे शैक्षणिक संशोधनाला उद्योगाची जोड मिळत असून, नवोपक्रमांच्या माध्यमातून समाजोपयोगी विकासाला गती मिळण्याची चिन्हे स्पष्टपणे दिसत आहेत.