बातम्या
लग्नाच्या वादातून मुलाचा आईवर जीवघेणा हल्ला..,
By nisha patil - 11/14/2025 1:01:59 PM
Share This News:
यड्राव : हातकणंगले तालुक्यातील कोरोची येथे लग्न लावून देत नसल्याच्या कारणावरून मुलाने स्वतःच्या आईवर विळतीने जीव घेण्याचा प्रयत्न केल्याची धक्कादायक घटना घडली. या हल्ल्यात आईचे अंगठ्याजवळील बोटाचे एक पेर तुटले असून तिच्यावर उपचार सुरू आहेत. जखमी महिलेचे नाव सुरेखा दादू गेजगे (वय 45, इंदिरानगर, कोरोची) असे आहे.
या प्रकरणी आरोपी वैभव दादू गेजगे (वय 24) याच्याविरोधात शहापूर पोलीस ठाण्यात गुन्हा दाखल करून त्याला अटक करण्यात आली आहे.
सुरेखा आपल्या पती, तीन मुले, सून व नातवंडांसोबत राहतात. पती दादू हे सेंट्रींग काम करून कुटुंबाचा उदरनिर्वाह करतात. वैभव हा अविवाहित असून दारूच्या व्यसनाधीनतेमुळे तो घरात वारंवार भांडणे काढत असल्यामुळे बुधवारी रात्री जेवणाच्या वेळी वैभवने लग्नाच्या मुद्द्द्यावरून आई सुरेखा हिच्याशी वाद घालायला सुरुवात केली. समजावून सांगूनही न ऐकता त्याने आईस व कुटुंबीयांना शिवीगाळ केली. "लवकर माझे लग्न लावून दे, नाहीतर तुला सोडणार नाही" अशी धमकी देत त्याने जवळची लोखंडी विळती उचलून आईवर हल्ला चढवला.
आईने हात आडवा घेतल्याने विळतीचा वार थेट उजव्या हातावर बसला आणि बोटाचे पेर तुटून खाली पडले. हात रक्तबंबाळ झाल्याचे पाहून वैभवने विळती तिथेच फेकून पळ काढला.
लग्नाच्या वादातून मुलाचा आईवर जीवघेणा हल्ला..,
|