बातम्या
साखरऊस ट्रकची मोटारसायकलला जोरदार धडक; भरतीला गेलेल्या युवकांचा मृत्यू
By nisha patil - 11/17/2025 11:03:26 AM
Share This News:
कोल्हापूर | 16 नोव्हेंबर 2025
खुटाळवाडी गावाजवळ कोल्हापूर–रत्नागिरी महामार्गावर रविवारी पहाटे भीषण अपघात झाला. उसाने भरलेल्या ट्रकने मोटारसायकलला दिलेल्या जबर धडकेत दोन तरुणांचा जागीच मृत्यू झाला. दोघेही सैन्य भरतीची प्रक्रिया पूर्ण करून आपल्या गावी परतत असताना ही दुर्घटना घडली.
अपघातात मृत्यू झालेल्यांमध्ये पारस आनंदा परीट (19) आणि सुरज ज्ञानदेव उंड्रीकर (20) यांचा समावेश आहे. दोघेही सैनिकी भरतीसाठी कोल्हापूरमध्ये आले होते. भरतीची चाचणी पूर्ण करून मोटारसायकलवरून आपल्या गावाकडे परत जाण्याच्या मार्गावर त्यांना हा मृत्यूचा जबर धक्का बसला.
स्थानिकांच्या म्हणण्यानुसार, उसाने भरलेल्या ट्रकने अचानक सटकून मोटारसायकलला जोराची धडक दिली. धडक एवढी भीषण होती की दोघांचेही जागीच निधन झाले. अपघातानंतर ट्रक चालकाने पळ काढण्याचा प्रयत्न केला; मात्र घटनास्थळी उपस्थित नागरिकांनी त्याला पाठलाग करून पकडले. पोलिसांनी चालकाला ताब्यात घेऊन पुढील तपास सुरू केला आहे.
घटनास्थळी मोठी गर्दी जमली होती. तरुणांच्या अकाली निधनाने परिसरात हळहळ व्यक्त केली जात आहे.
साखरऊस ट्रकची मोटारसायकलला जोरदार धडक; भरतीला गेलेल्या युवकांचा मृत्यू
|