राजकीय

खासबाग मैदानाच्या आखाड्याला मिळाली नवसंजीवनी; आमदार अमल महाडिक यांनी दिला संपूर्ण खुराकाचा खर्च

By nisha patil - 2/12/2025 11:37:27 AM
Share This News:

ऐतिहासिक राजर्षी शाहू खासबाग कुस्ती मैदानातील आखाडा सरावासाठी उपलब्ध करून देण्यात यावा अशी मागणी कोल्हापुरातील विविध तालीम संस्था आणि पैलवानांनी केली होती. याबाबत त्यांनी आमदार अमल महाडिक यांच्याकडे सातत्याने पाठपुरावा केला होता. नुकतीच आमदार अमल महाडिक यांनी खासबाग मैदानाला भेट देऊन सरावासाठी आवश्यक सुविधा तातडीने उपलब्ध करण्याचे निर्देश महापालिका प्रशासनाला दिले होते. 
यावेळी मैदानातील आखाड्यात सराव करताना पैलवानांना अनेक अडचणींचा सामना करावा लागतो. आखाड्यातील लाल मातीची मशागत करणे गरजेचे आहे. त्यासाठी सहकार्य करावे अशी विनंती पैलवानांनी आमदार महाडिक यांना केली होती. 
या विनंतीला मान देत आखाडा बनवण्यासाठी लागणारा सर्व खुराक देण्याचे अभिवचन आमदारांनी दिले होते. 
त्या अनुषंगाने आमदार महाडिक यांनी आखाडा बनवण्यासाठी १० पोती हळद, १० डबे सरकी तेल, १० पोती लिंबू, २० किलो कापूर, २ पोती काव, ५० लिटर दूध असा खुराक स्वखर्चातून पैलवानांकडे सुपूर्द केला. 
राजर्षी शाहू विजयी गंगावेश तालमीचे वस्ताद विश्वास हारुगले, पैलवान माऊली जमदाडे यांच्यासह गंगावेश तालमीच्या ५० हून अधिक पैलवानांनी खासबाग मैदानामध्ये आखाडा तयार करण्यास सुरुवात केली. 
सोमवारी दुपारी चार वाजता वस्तादांच्या हस्ते आखाडा पूजन करून माती उकरण्यास सुरुवात झाली. संपूर्ण आखाडा खोदून झाल्यानंतर या आखाड्यामध्ये हळद मिसळण्यात आली. त्यानंतर पाणी शिंपडून झाल्यावर सर्वत्र कापूर पसरण्यात आला. कापलेली दहा पोती लिंबे आखाड्यात सर्वत्र टाकण्यात आली. 
यानंतर आणलेली काव सर्वत्र शिंपडून झाल्यावर १० डबे सरकी तेल संपूर्ण आखाड्यात शिंपडण्यात आले. यानंतर सर्वत्र दूधही शिंपडण्यात आले. 
तयार झालेले हे मिश्रण काही काळ तसेच ठेवून त्यानंतर पुन्हा आखाडा उकरण्यास पैलवानांनी सुरुवात केली. संपूर्ण आखाड्यातील माती दोन-तीन वेळा वर-खाली करून खुराक एकजीव करण्यात आला. 
पुढील चार दिवस रोज सकाळी हा आखाडा उकरण्यात येणार असून त्यानंतर सरावासाठी हा आखाडा तयार होईल असे वस्ताद विश्वास हारुगले यांनी सांगितले.
हे काम लवकर होण्यासाठी रोटावेटरची आवश्यकता आहे. ही गरज बोलून दाखवताच आमदार महाडिक यांनी रोटावेटर उपलब्ध करून देण्याचे प्रयत्न करण्याचे आश्वासन दिले.
पैलवारांना सरावासाठी असणारी आखाड्याची आवश्यकता ओळखून स्वखर्चातून खुराक उपलब्ध करून दिल्याबद्दल पैलवान माऊली जमदाडे यांनी आमदार अमल महाडिक आणि महाडिक परिवाराचे आभार मानले. 
आमदार महाडिक यांच्या पाठपुराव्यामुळे कोल्हापुरातील मल्लांना सरावासाठी खासबाग मैदान उपलब्ध झाले. त्याचबरोबर या ठिकाणी सोयीसुविधा उपलब्ध करून देण्यात आमदार महाडिक यांचा सिंहाचा वाटा असल्याचे जमदाडे यांनी सांगितले. 
कोल्हापूर ही कुस्ती पंढरी आहे. या ठिकाणी कुस्तीसाठी लागणाऱ्या सर्व सुविधा उपलब्ध करून देण्यासाठी मी कटिबद्ध आहे. भविष्यात कोल्हापूरच्या राजर्षी शाहू खासबाग कुस्ती मैदानाला गतवैभव प्राप्त करून देण्यासाठी सर्वतोपरी प्रयत्न करेन. आणि कुस्तीच्या इतिहासातील कोल्हापूरचे स्थान सदैव उच्च राहण्यासाठी नेहमीच पुढाकार घेईन असा विश्वास आमदार अमल महाडिक यांनी दिला. 
याप्रसंगी राष्ट्रीय हॉकी खेळाडू व प्रशिक्षक विजय साळोखे सरदार यांच्यासह गंगावेश तालमीचे पैलवान उपस्थित होते.