बातम्या

वृषाल आण्णा हुक्केरी व शाळेतर्फे शैक्षणिक साहित्याचे वाटप

By nisha patil - 6/15/2026 4:59:55 PM
Share This News:

**गवसे ता.आजरा केंद्र शाळेत वाजत-गाजत पार पडला 'प्रवेशोत्सव' बालगोपाळांचे उत्साहात स्वागत*

*वृषाल आण्णा हुक्केरी व शाळेतर्फे शैक्षणिक साहित्याचे वाटप**

**आजरा(हसन तकीलदार)*:-आजपासून जिल्हा परिषदेच्या शाळांचा नवा शैक्षणिक हंगाम सुरू झाला असून, पहिल्याच दिवशी सर्वत्र आनंदाचे आणि उत्साहाचे वातावरण पाहायला मिळाले. आजरा येथील केंद्र शाळा गवसे येथेही विद्यार्थ्यांचा पहिला दिवस अत्यंत संस्मरणीय आणि उत्साही पद्धतीने साजरा करण्यात आला.

या विशेष 'प्रवेशउत्सव' सोहळ्याला जिल्हा परिषद सदस्य सुधीरभाऊ देसाई आणि सामाजिक कार्यकर्ते वृषाल आण्णा हुक्केरी यांची प्रमुख उपस्थिती होती. त्यांच्यासह शाळा व्यवस्थापन समितीचे सर्व पदाधिकारी, आदरणीय पालक आणि ग्रामस्थ मोठ्या संख्येने उपस्थित होते.

शाळेच्या पहिल्या दिवशी चिमुकल्यांच्या मनात असलेली भीती दूर व्हावी आणि त्यांच्यात शिक्षणाची गोडी निर्माण व्हावी, यासाठी शाळा प्रशासनाने जय्यत तयारी केली होती. नवीन प्रवेश घेतलेल्या आणि जुन्या विद्यार्थ्यांचे ढोल-ताशांच्या गजरात, वाजत-गाजत अत्यंत उत्साही वातावरणात स्वागत करण्यात आले.

शिक्षणासोबतच मुलांवर चांगले संस्कार व्हावेत आणि त्यांनी एका सुदृढ समाजाची निर्मिती करावी, या उद्देशाने याप्रसंगी उपस्थित सर्व विद्यार्थ्यांना 'व्यसनमुक्तीची' सामूहिक शपथ देण्यात आली. हा उपक्रम या प्रवेशोत्सवाचे मुख्य आकर्षण ठरला. त्यानंतर, विद्यार्थ्यांचा शाळेचा पहिला दिवस अधिक आनंददायी करण्यासाठी वृषाल आण्णा हुक्केरी आणि शाळा प्रशासनाच्या वतीने सर्व बालमित्रांना खाऊचे आणि शैक्षणिक साहित्याचे वाटप करण्यात आले. हातात नवा खाऊ आणि नवीन शैक्षणिक साहित्य मिळाल्यामुळे मुलांच्या चेहऱ्यावर एक वेगळाच आनंद आणि नवा हुरूप पाहायला मिळत होता.

विद्यार्थ्यांच्या या पहिल्या दिवसाचा उत्साह पाहून, ग्रामीण भागातील शिक्षणाचा दर्जा आणि मुलांची शाळेविषयीची ओढ अशीच कायम राहील, असा विश्वास उपस्थितांनी व्यक्त केला. या कार्यक्रमाला शिक्षक वृंद, ग्रामस्थ आणि पालकांचे मोलाचे सहकार्य लाभले.

यावेळी जि.प. सदस्य सुधीरभाऊ देसाई म्हणाले की,जिल्हा परिषदेच्या शाळा या केवळ शिक्षणाचे केंद्र नसून संस्कारांची खाण आहेत. आज पहिल्याच दिवशी मुलांचा हा उत्साह पाहून मन भरून आले. शिक्षणासोबतच आज विद्यार्थ्यांना दिलेली व्यसनमुक्तीची शपथ ही त्यांच्या भविष्याला योग्य आकार देणारी ठरेल. ग्रामीण भागातील प्रत्येक मुलाला दर्जेदार शिक्षण आणि चांगल्या सुविधा देण्यासाठी आम्ही कटिबद्ध आहोत. पालकांनीही शाळेच्या या उपक्रमांना अशीच साथ द्यावी असे त्यांनी यावेळी आवाहन केले.