राजकीय

राष्ट्रवादीत फूट पडणार नाही; विलीनीकरणावर हसन मुश्रीफांचे मोठे विधान

By Administrator - 12/11/2026 3:03:46 PM
Share This News:

राष्ट्रवादीत फूट पडणार नाही, विलीनीकरणाचा निर्णय सुनेत्रा पवार घेतील; गोकुळचा विषय संपवा – हसन मुश्रीफ

संजय राऊतांना नाक खुपसू नका म्हणत टोला; शिरसाटांच्या वक्तव्यावर एकनाथ शिंदेंना हस्तक्षेपाची विनंती | सतेज पाटील यांच्याशी वैयक्तिक संबंध कायम असल्याचेही स्पष्ट

कोल्हापूर :

राष्ट्रवादी काँग्रेस पक्षात २० ते २२ आमदार फुटणार असल्याच्या चर्चांना वैद्यकीय शिक्षण मंत्री हसन मुश्रीफ यांनी फेटाळून लावले आहे. उपमुख्यमंत्री सुनेत्रावहिनी पवार यांच्या नेतृत्वाखाली पक्षातील सर्व आमदार एकसंघ असून कोणीही पक्ष सोडून जाणार नाही, असा ठाम दावा त्यांनी केला. दोन्ही राष्ट्रवादींच्या विलीनीकरणाबाबतचा निर्णय सुनेत्रा पवार आणि ज्येष्ठ नेते शरद पवार घेतील. सुनेत्रावहिनी जो निर्णय घेतील, त्यामागे आम्ही ठामपणे उभे राहू, असेही त्यांनी स्पष्ट केले.

कोल्हापुरातील केडीसीसी बँकेत गुरुवारी आयोजित पत्रकार परिषदेत मुश्रीफ यांनी राज्यातील राजकारणापासून गोकुळच्या सत्तासंघर्षापर्यंत अनेक विषयांवर भूमिका मांडली.

संजय राऊतांना राष्ट्रवादीत नाक खुपसू नका!

राष्ट्रवादीचे २० ते २२ आमदार फुटणार असल्याच्या संजय राऊत यांच्या वक्तव्यावर मुश्रीफ यांनी टीका केली. संजय राऊत हे राज्याचे मुक्त विद्यापीठ आहेत. त्यांनी काय बोलावे, यावर कोणाचे बंधन नाही. मात्र, त्यांनी स्वतःच्या पक्षाकडे लक्ष द्यावे. आमच्या पक्षाची एवढी काळजी करण्याची गरज नाही, असे ते म्हणाले.

शिरसाटांच्या वक्तव्यावर शिंदेंना विनंती

राष्ट्रवादीत तिसरा गट निर्माण होण्याची शक्यता असल्याचे संजय शिरसाट यांनी केलेल्या वक्तव्यावरही मुश्रीफ यांनी नाराजी व्यक्त केली. महायुतीच्या समन्वय समितीत एकमेकांच्या पक्षांवर सार्वजनिक टीका न करण्याचे ठरलेले असताना काही नेते सातत्याने बिनबुडाची वक्तव्ये करीत आहेत. उपमुख्यमंत्री एकनाथ शिंदे यांनी अशा नेत्यांना कडक सूचना द्याव्यात, अशी विनंती त्यांनी केली.

विलीनीकरणाचा निर्णय दोन्ही नेतृत्व घेणार

दोन्ही राष्ट्रवादींच्या विलीनीकरणाबाबत विचारले असता योग्य वेळ आल्यानंतर माहिती दिली जाईल, असे सुनेत्रा पवार यांनी सांगितले आहे. त्यामुळे याबाबतचा अंतिम निर्णय दोन्ही पक्षांच्या नेतृत्वाने घ्यायचा आहे. सुनेत्रावहिनींच्या निर्णयामागे आम्ही ठामपणे उभे राहू, असे मुश्रीफ म्हणाले.

गोकुळचा विषय संपवा; ३० लाख लिटर दूध संकलनाचे लक्ष्य

गोकुळ दूध संघाच्या अध्यक्षपदाची निवड झाल्यानंतर आता राजकीय वाद थांबवून संघाच्या प्रगतीकडे लक्ष देण्याची गरज असल्याचे मुश्रीफ यांनी सांगितले. प्रशासकीय मंडळाच्या काळात झालेल्या निर्णयांचा आढावा घेऊन आवश्यक बदल करावेत. दूध संकलन वाढवून ३० लाख लिटरचा टप्पा गाठावा, असे आवाहन त्यांनी केले.

संघर्ष मोर्चावरील वक्तव्याबाबत दिलगिरीची भूमिका

गोकुळच्या अध्यक्ष निवडीवेळी केलेल्या वक्तव्यांवर टीका होत असल्याबाबत मुश्रीफ यांनी प्रतिक्रिया दिली. विरोधकांच्या संघर्ष मोर्चातील काही कृतींमुळे कार्यकर्ते संतप्त झाले होते. त्यातून रागापोटी आपल्या तोंडून ते वाक्य गेले. ते गेले नसते तर बरे झाले असते, असे त्यांनी मान्य केले.

सतेज पाटील जानी दुश्मन नाहीत!

गोकुळ निवडणुकीनंतर सतेज पाटील यांच्याशी संबंधांबाबत विचारले असता मुश्रीफ म्हणाले, आम्ही दोघेही कोल्हापुरातच राहणार आहोत. आम्ही एकमेकांचे जानी दुश्मन नाही. समोरासमोर आलोi तर नमस्कार होणारच. राजकारणात कोणी कोणाचा कायमचा शत्रू नसतो.

दुधाला सोन्याचा भाव मिळण्याची अपेक्षा

केडीसीसी बँकेकडून जातिवंत दुधाळ म्हशी खरेदीसाठी दिले जाणारे १० हजार रुपयांचे अनुदान वाढवून २० हजार रुपये करण्यासाठी प्रयत्नशील असल्याचे त्यांनी सांगितले. दूध उत्पादकांनी जनावरांची संख्या वाढवावी. गोकुळने दूध संकलन वाढविण्यासाठी एकत्रित प्रयत्न करावेत, असे आवाहनही त्यांनी केले.

केडीसीसी निवडणुकीतील समझोता योग्य वेळी

गोकुळनंतर केडीसीसी बँकेच्या निवडणुकीत समझोता होणार का, यावर सर्व नेते योग्य वेळी एकत्र बसून निर्णय घेतील, असे मुश्रीफ यांनी स्पष्ट केले.

एकूणच, या पत्रकार परिषदेत मुश्रीफ यांनी राष्ट्रवादीतील संभाव्य फूट आणि विलीनीकरणाच्या चर्चांवर पक्षाची भूमिका स्पष्ट करतानाच महायुतीतील नेत्यांच्या वक्तव्यांवर नाराजी व्यक्त केली. दुसरीकडे, गोकुळमधील संघर्ष मागे सोडून दूध संकलन, बाजारपेठ आणि संघाच्या विकासावर लक्ष केंद्रित करण्याचा संदेश दिला.