शैक्षणिक

डॉ. जयवंत गुंजकर यांची दक्षिण कोरियाच्या ब्रेन पूल फेलोशिपसाठी निवड

By Shivani - 10/28/2026 6:07:59 PM
Share This News:

कोल्हापूरच्या संशोधन क्षेत्राचा आंतरराष्ट्रीय गौरव! डॉ. जयवंत गुंजकर यांची दक्षिण कोरियाच्या ब्रेन पूल फेलोशिपसाठी निवड

कोल्हापूर :

डी. वाय. पाटील एज्युकेशन सोसायटी (अभिमत विद्यापीठ), कोल्हापूर येथील संशोधक डॉ. जयवंत एल. गुंजकर यांची दक्षिण कोरियातील प्रतिष्ठित ‘ब्रेन पूल फेलोशिप’साठी निवड झाली आहे. या निवडीमुळे कोल्हापूरच्या शैक्षणिक आणि संशोधन क्षेत्राच्या शिरपेचात मानाचा तुरा रोवला गेला आहे. विशेष म्हणजे, डॉ. गुंजकर यांना यापूर्वी भारत सरकारची प्रतिष्ठित रामानुजन फेलोशिपही मिळाली आहे.

दक्षिण कोरियातील चुंग-अंग विद्यापीठात करणार संशोधन

डॉ. जयवंत गुंजकर हे दक्षिण कोरियातील चुंग-अंग विद्यापीठाच्या फूड सायन्स अँड टेक्नॉलॉजी विभागातील फूड बायोसेन्सर अँड थेरानोसिस प्रयोगशाळेत संशोधन करणार आहेत. प्रा. जोंग पिल पार्क यांच्या मार्गदर्शनाखाली त्यांचे संशोधन होणार आहे. या फेलोशिपमुळे त्यांना प्रगत संशोधन सुविधा, आंतरराष्ट्रीय तज्ज्ञांचे मार्गदर्शन आणि जागतिक स्तरावरील संशोधन सहकार्याच्या संधी उपलब्ध होतील.

आंतरराष्ट्रीय संशोधन सहकार्याला मिळणार चालना

डी. वाय. पाटील अभिमत विद्यापीठाच्या सेंटर फॉर इंटरडिसिप्लिनरी रिसर्चमधील डॉ. गुंजकर यांच्या संशोधन कार्याचा त्यांच्या निवडीत महत्त्वपूर्ण वाटा आहे. आंतरविद्याशाखीय संशोधन, संशोधन प्रकल्पांची उभारणी आणि प्रगत संशोधन सुविधांच्या विकासासाठी त्यांनी केलेले प्रयत्न त्यांच्या संशोधन प्रवासासाठी महत्त्वपूर्ण ठरले आहेत.

या फेलोशिपच्या माध्यमातून चुंग-अंग विद्यापीठासोबत संयुक्त संशोधन प्रकल्प राबविणे, आंतरराष्ट्रीय संशोधनपत्रांचे प्रकाशन, शास्त्रज्ञांची देवाणघेवाण, संयुक्त संशोधन मार्गदर्शन, पेटंट आणि तंत्रज्ञान हस्तांतरण अशा विविध क्षेत्रांत सहकार्य वाढविण्याची संधी उपलब्ध होऊ शकते. त्यामुळे दोन्ही संस्थांमधील शैक्षणिक आणि संशोधनविषयक संबंध अधिक दृढ होण्यास मदत होणार आहे.

भारतीय संशोधन क्षेत्रासाठी योगदान देण्याचा मानस

दक्षिण कोरियातील संशोधनामुळे मिळणारा आंतरराष्ट्रीय अनुभव कोल्हापूर आणि डी. वाय. पाटील संस्थेच्या शैक्षणिक व संशोधन विकासासाठी उपयोगात आणण्याचा आपला प्रयत्न राहील, अशी भावना डॉ. गुंजकर यांनी व्यक्त केली. संयुक्त संशोधन, आंतरराष्ट्रीय प्रकाशने आणि विद्यार्थ्यांसाठी नव्या संशोधन संधी निर्माण करण्यासाठी आपण प्रयत्नशील राहणार असल्याचेही त्यांनी सांगितले.

डॉ. संजय डी. पाटील यांचे संशोधनासाठी पाठबळ

आपल्या संशोधन कार्यासाठी कुलपती डॉ. संजय डी. पाटील यांचे नेहमीच प्रोत्साहन आणि पाठबळ लाभल्याचे डॉ. गुंजकर यांनी नमूद केले. तसेच विद्यापीठाचे नेतृत्व, पदाधिकारी आणि सहकाऱ्यांचेही त्यांनी आभार मानले.

डॉ. गुंजकर यांच्या या यशाबद्दल कुलपती डॉ. संजय डी. पाटील, संस्थेचे उपाध्यक्ष आमदार सतेज डी. पाटील, विश्वस्त ऋतुराज पाटील, विश्वस्त पृथ्वीराज पाटील, कुलगुरू डॉ. राकेश कुमार शर्मा, कुलसचिव डॉ. व्ही. व्ही. भोसले आणि रिसर्च डायरेक्टर डॉ. पी. एस. पाटील यांनी त्यांचे अभिनंदन केले.