खेळ

भारताच्या पदकाच्या आशांना मोठा धक्का! घोट्याच्या दुखापतीमुळे नीरज चोप्राची माघार

By Shivani - 8/29/2026 5:46:55 PM
Share This News:

नीरज चोप्राचा आशियाई क्रीडा स्पर्धेला मोठा धक्का! घोट्याच्या दुखापतीमुळे उर्वरित हंगामातून माघार

मुंबई :

भारताचा स्टार भालाफेकपटू आणि ऑलिम्पिक सुवर्णपदक विजेता नीरज चोप्रा याने घोट्याच्या दुखापतीमुळे 2026 च्या उर्वरित हंगामातून माघार घेण्याचा निर्णय घेतला आहे. त्यामुळे आगामी आशियाई क्रीडा स्पर्धेत नीरज चोप्रा सहभागी होणार नसल्याचे स्पष्ट झाले आहे. भारतासाठी हा मोठा धक्का मानला जात आहे.

नीरज चोप्राने सोशल मीडियावर पोस्ट शेअर करत आपल्या दुखापतीची माहिती दिली. प्रशिक्षणादरम्यान त्याच्या घोट्याला दुखापत झाली. डॉक्टर आणि आपल्या टीमसोबत चर्चा केल्यानंतर त्याने या हंगामातील उर्वरित स्पर्धांमध्ये सहभागी न होण्याचा निर्णय घेतला आहे.

लॉजेन डायमंड लीगमध्ये दमदार कामगिरी

नीरज चोप्राने 21 ऑगस्ट रोजी झालेल्या लॉजेन डायमंड लीगमध्ये 88.05 मीटरची भालाफेक केली होती. हा त्याचा या हंगामातील सर्वोत्तम थ्रो ठरला. या कामगिरीनंतर नीरजला पुन्हा लय मिळत असल्याचे जाणवत होते.

मात्र, त्यानंतर घोट्याला झालेल्या दुखापतीमुळे त्याला मोठा निर्णय घ्यावा लागला. दुखापतीमुळे उर्वरित हंगामातून माघार घेत असल्याचे नीरजने स्पष्ट केले.

'लय मिळण्याच्या जवळ होतो, पण...'

नीरज चोप्राने आपल्या पोस्टमध्ये म्हटले की, अनेक दिवसांच्या मेहनतीनंतर लॉजेनमध्ये हंगामातील सर्वोत्तम थ्रो केल्यानंतर आपल्याला लय मिळत असल्याचे जाणवत होते. मात्र, काही वेळानंतर घोट्याला दुखापत झाली.

डॉक्टर आणि टीमच्या सल्ल्यानंतर उर्वरित हंगामात स्पर्धांमध्ये सहभागी न होण्याचा निर्णय घेतल्याचे नीरजने सांगितले.

दुखापत होणे निराशाजनक असल्याचेही त्याने म्हटले. आपण लय मिळवण्याच्या अगदी जवळ आलो होतो, असे वाटत असतानाच ही दुखापत झाल्याने निराशा झाली. मात्र, अडथळे हा प्रवासाचा एक भाग असतात, असे सांगत नीरजने आता पूर्ण लक्ष दुखापतीतून सावरण्यावर आणि ताकदीने पुनरागमन करण्यावर असल्याचे स्पष्ट केले.

आशियाई क्रीडा स्पर्धेत भारताला मोठा धक्का

नीरज चोप्राच्या पोस्टमध्ये थेट आशियाई क्रीडा स्पर्धेतून माघार घेतल्याचा उल्लेख नसला, तरी त्याने संपूर्ण उर्वरित हंगामातून माघार घेतल्याचे स्पष्ट केले आहे. त्यामुळे आगामी आशियाई क्रीडा स्पर्धेत नीरज चोप्रा दिसणार नसल्याचे निश्चित मानले जात आहे.

नीरजने यापूर्वी झालेल्या दोन्ही आशियाई क्रीडा स्पर्धांमध्ये सुवर्णपदक जिंकले आहे. त्यामुळे त्याची अनुपस्थिती भारतीय अॅथलेटिक्स संघासाठी मोठा धक्का आहे.

2023 मध्ये नीरजने जिंकले होते सुवर्णपदक

2023 मध्ये चीनमधील हांगझोऊ येथे झालेल्या आशियाई क्रीडा स्पर्धेत नीरज चोप्राने 88.88 मीटरचा थ्रो करत सुवर्णपदक पटकावले होते. भारताच्या किशोर जेनाने या स्पर्धेत रौप्यपदक जिंकले होते.

गेल्या दोन्ही आशियाई क्रीडा स्पर्धांमध्ये सुवर्णपदक जिंकणाऱ्या नीरजकडून यंदाही मोठ्या अपेक्षा होत्या. मात्र, दुखापतीमुळे त्याला स्पर्धेतून माघार घ्यावी लागल्याने भारताच्या पदकाच्या अपेक्षांना मोठा धक्का बसला आहे.

टोक्यो ऑलिम्पिकमध्ये रचला इतिहास

नीरज चोप्राने 2021 मध्ये टोक्यो ऑलिम्पिकमध्ये भारतासाठी भालाफेकीत सुवर्णपदक जिंकून ऐतिहासिक कामगिरी केली होती. ऑलिम्पिकमध्ये अॅथलेटिक्समधील सुवर्णपदक जिंकणारा तो भारताचा पहिला खेळाडू ठरला.

आता नीरजचे लक्ष दुखापतीतून पूर्णपणे सावरण्यावर असून, पुढील हंगामात तो दमदार पुनरागमन करण्याच्या तयारीत असेल.