शैक्षणिक

JEEच्या धर्तीवर NEETमध्ये मोठे बदल? वर्षातून दोन सत्रांत परीक्षा घेण्याचा सरकारचा विचार

By Shivani - 6/8/2026 3:38:43 PM
Share This News:

JEEच्या धर्तीवर NEETमध्ये मोठे बदल? वर्षातून दोन सत्रांत परीक्षा घेण्याचा सरकारचा विचार

नवी दिल्ली :

देशातील वैद्यकीय शिक्षणासाठीची सर्वात महत्त्वाची प्रवेश परीक्षा NEET-UGच्या स्वरूपात मोठे बदल होण्याची शक्यता आहे. JEE Mainच्या धर्तीवर NEET परीक्षा वर्षातून दोन सत्रांत घेण्याचा पर्याय केंद्र सरकार विचाराधीन असल्याची माहिती समोर आली आहे. यासोबतच कॉम्प्युटर-आधारित परीक्षा (CBT) पद्धतीचाही गंभीरपणे विचार सुरू आहे.

गेल्या काही वर्षांत NEET परीक्षेदरम्यान प्रश्नपत्रिका फुटणे, गैरप्रकार आणि परीक्षा प्रक्रियेतील पारदर्शकतेवर उपस्थित झालेल्या प्रश्नांच्या पार्श्वभूमीवर परीक्षा पद्धतीत व्यापक बदल करण्याची तयारी सुरू आहे. या बदलांचा मुख्य उद्देश परीक्षा अधिक सुरक्षित, पारदर्शक आणि विद्यार्थ्यांसाठी सुलभ बनवणे हा आहे.

कोणते बदल होऊ शकतात?

केंद्र सरकार आणि संबंधित तज्ज्ञ समिती पुढील पर्यायांचा अभ्यास करत असल्याचे समोर आले आहे.

• NEET परीक्षा वर्षातून दोन सत्रांत आयोजित करणे.

• Computer-Based Test (CBT) पद्धतीने परीक्षा घेणे.

• JEE Mainप्रमाणे विद्यार्थ्यांना दोन संधी देणे.

• दोन प्रयत्नांपैकी सर्वोत्तम गुण अंतिम प्रवेशासाठी ग्राह्य धरण्याचा पर्याय.

• परीक्षा व्यवस्थापन अधिक सुरक्षित आणि तंत्रज्ञानाधारित करणे.

विद्यार्थ्यांना काय फायदा होऊ शकतो?

तज्ज्ञांच्या मते, वर्षातून दोनदा परीक्षा झाल्यास विद्यार्थ्यांवरील मानसिक ताण कमी होऊ शकतो. एखाद्या दिवशी अपेक्षेप्रमाणे कामगिरी झाली नाही तरी दुसरी संधी उपलब्ध होईल. तसेच सर्वोत्तम गुण ग्राह्य धरल्यास स्पर्धा अधिक न्याय्य होण्यास मदत होऊ शकते.

अंतिम निर्णय अद्याप नाही

महत्त्वाची बाब म्हणजे, NEET परीक्षा वर्षातून दोनदा घेतली जाईल किंवा CBT मोडमध्येच होईल, असा कोणताही अधिकृत निर्णय अद्याप जाहीर झालेला नाही. केंद्र सरकार तज्ज्ञ समितीच्या शिफारशींचा अभ्यास करत असून, त्यानंतरच अंतिम निर्णय घेतला जाणार आहे.

विद्यार्थी आणि पालकांनी सोशल मीडियावरील अप्रमाणित माहिती किंवा अफवांवर विश्वास न ठेवता NTA आणि शिक्षण मंत्रालयाच्या अधिकृत घोषणांवरच विश्वास ठेवावा, असे आवाहन करण्यात येत आहे.