बातम्या

पाकिस्तानी गँगस्टरशी कथित संपर्काचा संशय; कोल्हापूर, सांगली, साताऱ्यात एटीएसची चौकशी

By Shivani - 11/7/2026 3:00:42 PM
Share This News:

चार तरुणांची सात तास कसून चौकशी; शहर सोडू नये अशा सूचना, पुढील तपास सुरू

कोल्हापूर | प्रतिनिधी :

पश्चिम महाराष्ट्रात एका संवेदनशील प्रकरणामुळे खळबळ उडाली आहे. पाकिस्तानी गँगस्टरशी कथित संपर्क असल्याच्या संशयावरून महाराष्ट्र दहशतवाद विरोधी पथक (ATS) ने कोल्हापूर, सांगली आणि सातारा जिल्ह्यातील काही तरुणांची चौकशी केल्याची माहिती समोर आली आहे. मिळालेल्या माहितीनुसार, पाकिस्तानी गँगस्टर मुरक्या शहाजाद भट्टी याच्याशी संपर्क असल्याच्या संशयातून एटीएसने तपासाची सूत्रे हलवली. या तपासादरम्यान चार तरुणांची चौकशी करण्यात आली असून, यामध्ये कोल्हापूर जिल्ह्यातील दोन तरुणांचा समावेश असल्याचे सांगितले जात आहे.

सात तास चालली चौकशी; विविध बाबींची पडताळणी

एटीएसच्या पथकाने संबंधित तरुणांना चौकशीसाठी ताब्यात घेत शहराबाहेरील एका ठिकाणी नेले. तेथे तब्बल सात तास त्यांची सखोल चौकशी करण्यात आली. या चौकशीत संबंधित तरुणांचे संपर्क, सोशल मीडिया कनेक्शन, व्यवहार आणि इतर संशयास्पद बाबींची माहिती तपासण्यात आल्याचे समजते. चौकशीनंतर तरुणांना सोडण्यात आले असून, पुढील सूचना मिळेपर्यंत शहर किंवा जिल्ह्याबाहेर जाऊ नये, अशा सूचना देण्यात आल्याची माहिती आहे.

अद्याप गुन्हा दाखल नाही; तपास सुरूच

दरम्यान, या प्रकरणात संबंधित तरुणांविरोधात अद्याप कोणताही गुन्हा दाखल करण्यात आलेला नाही. एटीएसकडून सध्या केवळ माहितीची पडताळणी आणि तपास प्रक्रिया सुरू असल्याचे सांगण्यात येत आहे. संशयास्पद संपर्क, डिजिटल पुरावे, सोशल मीडिया हालचाली आणि इतर संबंधित बाबींचा तपास एटीएसकडून केला जात आहे.

तपासानंतरच स्पष्ट होणार नेमकं सत्य

या प्रकरणात नेमका संपर्क किती गंभीर स्वरूपाचा होता? त्यामागे कोणते संबंध आहेत? याचा उलगडा एटीएसच्या पुढील तपासानंतरच होणार आहे. सुरक्षेच्या दृष्टीने एटीएसकडून संपूर्ण कारवाई गोपनीय पद्धतीने सुरू असून, पश्चिम महाराष्ट्रातील या हालचालींकडे सर्वांचे लक्ष लागले आहे.