शैक्षणिक

आधुनिक सुविधा, 50 बेडचे रुग्णालय आणि आता BHMS अभ्यासक्रमालाही मान्यता

By Administrator - 4/7/2026 1:27:04 PM
Share This News:

कागल | प्रतिनिधी  :  

कोल्हापूर जिल्ह्यातील कागल तालुक्यातील पिंपळगाव खुर्द येथील शासकीय होमिओपॅथी महाविद्यालय व रुग्णालयाला राष्ट्रीय होमिओपॅथी आयोग (National Commission for Homoeopathy - NCH), नवी दिल्ली यांच्याकडून बीएचएमएस (BHMS) पदवी अभ्यासक्रमासाठी अधिकृत मान्यता (Letter of Permission) मिळाली आहे. या मान्यतेमुळे महाविद्यालयात 100 विद्यार्थ्यांच्या प्रवेशक्षमतेसह शैक्षणिक वर्ष सुरू करण्याचा मार्ग मोकळा झाला आहे.

वैद्यकीय शिक्षण मंत्री हसन मुश्रीफ यांच्या मार्गदर्शनाखाली आणि सातत्यपूर्ण प्रयत्नांमुळे ही मान्यता मिळाल्याचे महाविद्यालय प्रशासनाने सांगितले आहे. या निर्णयामुळे महाराष्ट्रातील होमिओपॅथी शिक्षण क्षेत्राला नवी चालना मिळणार असल्याचे मानले जात आहे.

आधुनिक सुविधा आणि सुसज्ज रुग्णालय

राष्ट्रीय होमिओपॅथी आयोगाच्या सर्व निकषांनुसार महाविद्यालयात अत्याधुनिक सुविधा विकसित करण्यात आल्या आहेत. येथे सुसज्ज प्रयोगशाळा, डिजिटल एक्स-रे युनिट, मेडिसिन, शल्यचिकित्सा, स्त्रीरोग व प्रसूतीतंत्र तसेच बालरोग विभागांच्या स्वतंत्र बाह्यरुग्ण सेवा (OPD) उपलब्ध आहेत. याशिवाय 50 खाटांचे आंतररुग्ण विभाग (IPD) कार्यान्वित करण्यात आले असून, आतापर्यंत 10 हजारांहून अधिक रुग्णांनी येथे उपचारांचा लाभ घेतला आहे.

विद्यार्थ्यांसाठी आधुनिक शिक्षण सुविधा

विद्यार्थ्यांच्या गुणवत्तापूर्ण प्रशिक्षणासाठी महाविद्यालयात अत्याधुनिक स्किल लॅब, Medical Education Technology (MET) Unit, ई-लर्निंग सुविधा आणि अद्ययावत ग्रंथालयाची व्यवस्था करण्यात आली आहे. राष्ट्रीय अभ्यासक्रमानुसार पुस्तके, जर्नल्स आणि ई-रिसोर्सेस उपलब्ध करून देण्यात आले असून, अनुभवी प्राध्यापक व प्रशिक्षित कर्मचारी अध्यापनासाठी नियुक्त करण्यात आले आहेत.

पश्चिम महाराष्ट्रातील पहिले शासकीय होमिओपॅथी महाविद्यालय

पिंपळगाव खुर्द येथील हे महाविद्यालय पश्चिम महाराष्ट्रातील पहिले आणि संपूर्ण महाराष्ट्रातील दुसरे शासकीय होमिओपॅथी महाविद्यालय आहे. उच्च दर्जाचे शिक्षण, गुणवत्तापूर्ण आरोग्यसेवा आणि कौशल्याधारित वैद्यकीय प्रशिक्षणाचा संगम साधत हे महाविद्यालय 100 विद्यार्थ्यांच्या प्रवेशासाठी पूर्णपणे सज्ज असल्याचे अधिष्ठाता डॉ. अभिजीत अहिरे यांनी सांगितले.

प्रमुख मुद्दे

• राष्ट्रीय होमिओपॅथी आयोगाकडून BHMS अभ्यासक्रमाला मान्यता

• 100 विद्यार्थ्यांच्या प्रवेशासाठी Letter of Permission प्राप्त

• 50 खाटांचे सुसज्ज रुग्णालय आणि अत्याधुनिक OPD सुविधा

• 10 हजारांहून अधिक रुग्णांनी घेतला उपचारांचा लाभ

• पश्चिम महाराष्ट्रातील पहिले शासकीय होमिओपॅथी महाविद्यालय