बातम्या

प्रेमानंद महाराजांचा आश्रम पुन्हा चर्चेत; १७ वर्षीय अनुज चौधरी बेपत्ता, कुटुंबीयांचे आंदोलन

By Shivani - 3/10/2026 3:19:08 PM
Share This News:

प्रेमानंद महाराजांचा आश्रम पुन्हा चर्चेत; १७ वर्षीय मुलासह तिघे बेपत्ता असल्याचा दावा

वृंदावन :

वृंदावन येथील प्रेमानंद महाराजांचे राधा केलि कुंज आश्रम पुन्हा एकदा चर्चेत आले आहे. आश्रमाशी संबंधित काही व्यक्ती बेपत्ता असल्याचे दावे समोर आल्यानंतर आश्रमातील व्यवस्थेबाबत विविध चर्चा सुरू झाल्या आहेत. दरम्यान, १७ वर्षीय अनुज चौधरी बेपत्ता झाल्याचा दावा त्याच्या कुटुंबीयांनी केला असून, त्याचा शोध घेण्यासाठी कुटुंबीय आश्रमाबाहेर आंदोलनाला बसले आहेत.

१७ वर्षीय अनुज चौधरी बेपत्ता असल्याचा कुटुंबीयांचा दावा

मिळालेल्या माहितीनुसार, आश्रमात आलेला १७ वर्षीय अनुज चौधरी बेपत्ता झाला असल्याचे त्याच्या कुटुंबीयांचे म्हणणे आहे. अनुजचा शोध घेऊन त्याला सुखरूप परत आणावे, अशी मागणी कुटुंबीयांनी केली आहे. यासाठी त्यांनी प्रेमानंद महाराजांच्या आश्रमासमोर आंदोलन सुरू केले आहे.

आश्रमातील काही शिष्यांकडून अनुजच्या शोधासाठी अपेक्षित सहकार्य मिळत नसल्याचा आरोपही कुटुंबीयांनी केला आहे. मात्र, या आरोपांबाबत अधिकृत तपास किंवा प्रशासनाकडून समोर आलेली माहिती स्पष्ट होणे बाकी आहे.

नोएडाहून आलेली महिलाही बेपत्ता?

याचदरम्यान, नोएडाहून प्रेमानंद महाराजांच्या आश्रमात आलेली एक महिला बेपत्ता असल्याची माहितीही समोर आली आहे. तिचे वडील मुलीचा शोध घेण्यासाठी वृंदावनमध्ये दाखल झाल्याचे सांगितले जात आहे.

याशिवाय, आश्रमाबाहेरील एका ढाब्यावर काम करणाऱ्या महिलेचे १० वर्षांचे मूलही बेपत्ता असल्याचे सांगितले जात आहे. त्यामुळे या वेगवेगळ्या घटनांमुळे परिसरात चर्चेला उधाण आले आहे.

सोशल मीडियामुळे प्रेमानंद महाराजांची लोकप्रियता वाढली

प्रेमानंद महाराज गेल्या काही वर्षांत सोशल मीडियामुळे देशभरात मोठ्या प्रमाणात चर्चेत आले. २०२३ मध्ये क्रिकेटपटू विराट कोहली आणि अभिनेत्री अनुष्का शर्मा आपल्या मुलीसह त्यांच्या आश्रमात पोहोचले होते. त्यानंतर प्रेमानंद महाराजांच्या सत्संगाचे व्हिडिओ सोशल मीडियावर मोठ्या प्रमाणात व्हायरल झाले.

त्यांच्या रात्रीच्या पदयात्रेलाही मोठी गर्दी होऊ लागली. अनेक प्रसिद्ध व्यक्ती आश्रमात येत असल्याने प्रेमानंद महाराजांची लोकप्रियता आणखी वाढली.

रात्रीची पदयात्रा आणि सत्संगाच्या व्हिडिओंबाबत चर्चा

गेल्या काही काळापासून प्रेमानंद महाराजांची रात्रीची पदयात्रा बंद असल्याचे सांगितले जात आहे. याशिवाय त्यांच्या यूट्यूब चॅनेलवर पूर्वी नियमितपणे प्रसारित होणारे नवीन सत्संगाचे व्हिडिओही उपलब्ध होत नसल्याची चर्चा आहे.

काही काळ जुन्या व्हिडिओंचे प्रसारण सुरू होते; मात्र आता तेही बंद झाल्याचे सांगितले जात आहे. त्यामुळे त्यांच्या अनुयायांमध्ये सोशल मीडियावर विविध चर्चा सुरू आहेत.

नवीन आश्रमाच्या ठिकाणाबाबतही चर्चा

काही काळापूर्वी प्रेमानंद महाराज यमुना नदीच्या पलीकडे नवीन आश्रम उभारत असल्याची चर्चा झाली होती. त्यानंतर ते त्या ठिकाणी गेल्याचेही सांगितले गेले. मात्र, या बदलामागील कारणाबाबत आश्रमाकडून स्पष्ट माहिती समोर आलेली नाही.

आता एकापाठोपाठ एक व्यक्ती बेपत्ता असल्याचे दावे समोर आल्याने राधा केलि कुंज आश्रम पुन्हा चर्चेच्या केंद्रस्थानी आला आहे. या प्रकरणांमध्ये नेमके काय घडले, याबाबत अधिकृत तपासातूनच स्पष्टता येणे अपेक्षित आहे.