मनोरंजन

सह्याद्रीच्या कुशीतलं निसर्गरत्न! साळशीचा ‘केगदी धबधबा’ पर्यटकांच्या आकर्षणाचं केंद्र

By Shivani - 11/7/2026 3:14:41 PM
Share This News:

घनदाट वनराई, फेसाळणारे पाणी आणि निसर्गाचा अद्भुत अनुभव; सिंधुदुर्गातील नव्या पर्यटनस्थळाला विकासाची प्रतीक्षा

सिंधुदुर्ग | प्रतिनिधी : गवस शुभम

पावसाळा सुरू होताच निसर्गाने हिरवा शालू परिधान केला आहे... अशाच निसर्गसौंदर्याने नटलेल्या सिंधुदुर्ग जिल्ह्यातील एका अनोख्या ठिकाणाकडे पर्यटकांची पावले वळू लागली आहेत. देवगड तालुक्यातील साळशी येथील ‘केगदी धबधबा’ सध्या निसर्गप्रेमींसाठी आकर्षणाचे केंद्र ठरत आहे.

सह्याद्रीच्या कुशीत वसलेला हा धबधबा म्हणजे निसर्गाचा अप्रतिम आविष्कार आहे. घनदाट जंगल, काळसर कातळावरून कोसळणारे फेसाळ पाणी आणि सभोवतालची हिरवाई यामुळे येथे येणाऱ्या पर्यटकांना एक वेगळाच आनंद अनुभवायला मिळतो.

निसर्ग, इतिहास आणि अध्यात्माचा संगम

साळशी-चाफेड मार्गावरील सरमळेवाडी येथील श्री देव वटेश्वर-महादेव मंदिराच्या मागील बाजूस, अवघ्या पाच मिनिटांच्या अंतरावर हा धबधबा आहे. त्यामुळे पर्यटकांना येथे पोहोचणेही सोयीचे आहे.

या परिसराचे वैशिष्ट्य म्हणजे केवळ धबधबाच नाही, तर येथील समृद्ध जैवविविधताही आहे. परिसरात बारमाही झरा, ऐतिहासिक तळे, विविध प्रजातींचे पक्षी आणि औषधी वनस्पती आढळतात. त्यामुळे हा भाग पर्यावरणाच्या दृष्टीनेही अत्यंत महत्त्वाचा मानला जातो.

साळशीच्या पर्यटनाला मिळू शकते नवी ओळख

साळशी गावातील पुरातन मंदिरे आणि ऐतिहासिक सदानंद गड यामुळे या परिसराचे पर्यटन महत्त्व आणखी वाढले आहे. निसर्ग, इतिहास आणि धार्मिक पर्यटनाचा सुंदर संगम या भागात पाहायला मिळतो.

मात्र, या ठिकाणी अद्याप पर्यटकांसाठी आवश्यक सुविधा, सुरक्षिततेच्या उपाययोजना आणि मूलभूत सोयींची गरज आहे. जर प्रशासनाने याकडे लक्ष दिले, तर ‘केगदी धबधबा’ सिंधुदुर्ग जिल्ह्यातील एक प्रमुख पर्यटनस्थळ म्हणून विकसित होऊ शकतो, अशी अपेक्षा ग्रामस्थ आणि निसर्गप्रेमींकडून व्यक्त केली जात आहे.

निसर्गप्रेमींसाठी स्वर्गीय अनुभव

शहराच्या धावपळीपासून दूर... निसर्गाच्या सानिध्यात काही क्षण शांततेचे अनुभवायचे असतील, तर साळशीचा ‘केगदी धबधबा’ पर्यटकांसाठी एक उत्तम पर्याय ठरू शकतो.सह्याद्रीच्या कुशीत लपलेलं हे निसर्गरत्न आता पर्यटनाच्या नकाशावर आपली वेगळी ओळख निर्माण करण्याच्या प्रतीक्षेत आहे.