बातम्या
संत बाळूमामा देवस्थानात ६० कोटींच्या कथित घोटाळ्याची खळबळ; प्रशासकांसह सचिवांवर गुन्हा
By Shivani - 7/21/2026 4:09:32 PM
Share This News:
संत बाळूमामा देवस्थानात ६० कोटींच्या कथित आर्थिक गैरव्यवहाराचा आरोप; प्रशासकांसह सचिवांवर गुन्हा
आदमापूर (कोल्हापूर) : लाखो भाविकांचे श्रद्धास्थान असलेल्या आदमापूर येथील श्री संत बाळूमामा देवस्थान ट्रस्ट आर्थिक गैरव्यवहाराच्या गंभीर आरोपांमुळे पुन्हा चर्चेत आले आहे. देवस्थानाच्या आर्थिक व्यवहारांमध्ये मोठ्या प्रमाणावर अनियमितता झाल्याचा आरोप चौकशीत समोर आला असून, सुमारे ६० कोटी रुपयांच्या कथित आर्थिक गैरव्यवहारप्रकरणी संबंधित प्रशासक, सचिव आणि इतर जबाबदार व्यक्तींविरोधात गुन्हा दाखल करण्यात आला आहे.
मिळालेल्या माहितीनुसार, या प्रकरणाची सुरुवात २०२१ मध्ये काही भाविक आणि हितसंबंधी व्यक्तींनी धर्मादाय आयुक्त कार्यालयाकडे केलेल्या तक्रारीनंतर झाली. तक्रारीनंतर आर्थिक व्यवहारांची चौकशी सुरू करण्यात आली.
चौकशीदरम्यान अनेक आर्थिक अनियमितता निदर्शनास आल्याचा दावा करण्यात आला. त्यानंतर २०२३ मध्ये विद्यमान विश्वस्त मंडळ बरखास्त करून प्रशासक मंडळाची नियुक्ती करण्यात आली. आता या प्रकरणात गुन्हा दाखल झाल्याने तपासाला नवे वळण मिळाले आहे.
तपास यंत्रणा देवस्थानातील आर्थिक व्यवहार, देणग्यांचा वापर आणि निधीच्या खर्चाची सखोल चौकशी करत आहे. या तपासात आणखी काही नावे समोर येण्याची शक्यता नाकारता येत नसल्याचे सूत्रांनी सांगितले.
दरम्यान, देवस्थानातील देणग्यांचा पारदर्शक वापर व्हावा, दोषींवर कठोर कारवाई व्हावी आणि संपूर्ण प्रकरणाचा निष्पक्ष तपास व्हावा, अशी मागणी भाविकांकडून होत आहे.
लाखो भाविकांच्या श्रद्धेशी संबंधित असलेल्या या प्रकरणात तपास यंत्रणा पुढे कोणते नवे खुलासे करते, याकडे संपूर्ण राज्याचे लक्ष लागले आहे.
Admapur balumama temple Trust,
|